Festus Hamalwa
Ondodo onhihetatu otai shuna mo mosekundofikola Haimbili Haufiku neudo, omo ovanafikola va teelelwa okukala va tameka eetundi davo mOmaandaxa oshivike tashi ya.
Edi oda tongwa momutumba wa li ko Omaandaxa keembelewa dakula dehongo moshitukulwa shaHangwena, oo kwa li wa kaliwa komukulunhuwiliki mehongo, ngoloneya waHangwena,
elelowiliki losekundofikola
Haimbili Haufiku nosho yo ovanambelewa va yooloka va dja koshikondo shehongo.
Omutumba okwa li wa ningwa u li kombinga lekangha eli kwa li la ningwa kovadali momudingonoko wEenhana oshivike sha dja ko eshi kwa li ve li momunyanyo wopambili tava pula ondodo onhihetatu opo i kale ya shuna mosekondofikola yaHaimbili Haufiku neudo.
Ovadali pamwe nelelowiliki ova kala va handuka konima eshi ondodo onhihetatu ya kufwa moHaimbili Haufiku shaashi okwa li va ika okutuma ounona vavo va ka fikole ondodo oyo moHaimbili Haufiku.
Ovadali ove udite kutya kasha li pauyuuki eshi ondodo onhihetatu ya kufwa mofikola hai piti nawa
shaashi ounona vahapu ngeenge ova tameke tete oyo moHaimbili Haufiku ohava kala va patuluka nawa fiyo tava i keendodo dopombada.
Ovadali vamwe vokoitukulwa ya yooloka ngaashi Oshana, Omusati nOshikoto navo okwa li va uda nai eshi ondodo 8 ya dja mo moHaimbili Haufiku shaashi navo okwa li hava tumu ounona vavo ve uye okufikola okudja mondodo 8 koHaimbili Haufiku.
Okudja momudo 2020 elelowiliki lofikola ola kala nokuninga eenghendabala dokutuma omikanda kombelewa yomukunhuwiliki moshitukulwa shaHangwena tali pula ondodo 8 i kale ya shuna moHaimbili ashike ihava pewa enyamukulo liwa.
Meenghundafana va ninga naKundana omukulunhuwiliki wehongo moshitukulwa shaHangwena Isak Hamatwi okwa koleka ta ti ondodo 8 otai shuna moHaimbili Haufiku ngaashi naana sha tokolwa momutumba ou va ninga.
Hamatwi okwa ti ounona ashike 42 ovo va teelelwa okukala va tameka ondodo 8 moHaimbili Haufiku oshivike tashi ya, onghee otapa ka kala ashike pe na ondodo 8 imwe neudo.
Okwa ti eendodo dimwe otadi ka wedwa po ashike modula tai ya shaashi paife kape na sha onhele ya wana yokutula eendodo dihapu do 8 manga.
“Ounona ashike ava ve na omadina
a shangwa nale momutumba ou kwa li wa ningwa tete kovadali nelelowiliki lofikola moHaimbili Haufiku, ovo va telelwa okukala va tameka ondodo 8 Omaandaxa moHaimbili Haufiku shaashi omadina avo okwa li a shangifwa nale,” Hamatwi ta ti.
Okwa kunghulila ovahongifikola opo va longe nondjungu okudja ketameko lodula, opo ovanafikola va pite noitwa iwa kexulilo
lomudo.