Omupedu presidende wehangano lovanhu ve na oulema woshipa loNamibia Albino Association Trust Walde Kambabi okwa ti ovanhu ve na oulema woshipa ova taalela eshongo linene eshi natango tava twikile nokukala tava ningilwa okatongotongo.
Kambabi okwa ti ombelewa yaye ohai lopotelwa oikando ihapu kombinga yovanhu eshi hava kala tava ningilwa okatongotongo omolwouukwatya wavo woshipa.
Ta ti unene tuu oovene vomikunda ovo vamwe va didilikwa tava anyene ovanhu ava edu lomapya.
Edi Kambabi okwe di popya Etivali eshi va ninga eenghundafana naKundana eshi a hokolola ta ti oovene vomikunda kave hole okuyandja edu kovanhu ve na oulema woshipa shaashi vati itava dulu okulonga mepya.
Okwa ti ovanhu vahapu ve na oulema woshipa ohava yandje omakemo avo kombelewa yaye omolwonghalo ei ihe na ouyuki.
Shikwao vali Kambabi okwa hokolola kombinga yovalumenhu ve na oulema woshipa ta ti ohava kala va talela eshongo linene lokumona ovakainhu ve na oshipa shilaula omanga vamwe ngeenge va mona ovakainhu ve na oshipa shilaula ohava kala tava u lwa kovakwapata vovakainhu vavo tava ti kutya ovanhu ve na oulema woshipa ove na omupya ngenege ovakufa ovakainhu momapata avo.
“Ombelewa yetu oya didilika ovakainhu vahapu ve e hole okuya mekwatafano lopaihole novanhu ve na oulema woshipa shaashi vati oshina omupya,” Kambabi ta ti.
Okwa hokolola yoo vali kombinga younona vovanafikola ve na oulema woshipa eshi hava kala veli moupyakadi wokumona koshipelende ngeenge omuhongifikola ta longo.
“Ohatu lopotelwa ounona ve na oulema iha pewa eembepila doinyolwa dokukala tava landula ngeenge omuhongifikola ta longo koshipelende, onghee ounona ovo iha dula vali okukala tava landula kwa shi tashi longwa shaashi kave wete ko koshipelende,” Kambabi ta ti.
Onghee okwa kunghulila eefikola opo di kale tadi yandje eembapila doinyolwa kovanafikola ve na oulema woshipa shaashi iha dulu okumona eendada da shangwa koshipelende.
Okwa weda po ta ti ombelewa yavo ninga ofilima tai yandje ehongo kombinga yokatongotongo ha ka ningilwa ovanhu vena oulema woshipa opo oshiwana shi kale sha xulifa po onghalo yokatongotongo.
Okwa ti ofilima otai kala tai danwa koTV opo oshiwana shi kale mona ouyelele nghee shapaka okuningila ovanhu okatongotongo.
Kambabi okwa pandula epangelo eshi tali twikile nokukala tali yambidida ovanhu ve na oulema woshipa ngaashi okuyandja omaadi okuvava noshimaliwa shokulikwafela shopendjela.
Okwa kunghulila oshiwana opo shi kale shina elongelokumwe nombili novanhu ve na oulema woshipa shaashi navo ovanhu ashike ngaashi ovanhu aveshe.