Victoria kaapanda
Elelo lyondoolopa yaShakati otali ka longitha oomilliona N$40 okuhumitha komeho Ehenye.
Shoka otashi ka ningwa okugwanitha po omauvaneko ga ningwa kaaleli yondoolopa yaShakati mokuhumitha nokuyambula po ondoolopa yawo. Omukuluntuwiliki gwelelo lyondoolopa yaShakati Timoteus Namwandi okwa ti, oshimaliwa shoka otashi ka longithwa okwoopaleka omahala ge li 283, oondjila, oku eta po omeya nolusheno oshowo elambo lyonyata.
“Elelondoolopa olya tameka nale okulonga elambo lyonyata, osho wo omeya nolusheno komahala hoka,” ta popi ngaaka.
Ta ti, elalakano okwoopaleka ondoolopa yawo, yi kale pamuthika gwoondoolopa oonkwawo oshowo okulongela aakalimo yawo omauwanawa, ya mone wo kutya oye li mondoolopa.
Ta gwedha po ta ti, oyindji ya li ya tengenekwa metengenekothaneko lyomumvo gwa yi, okwa li ya gwanithwa po.
“Oondjila oshowo omalambo goku enda omeya ngoka kwa li ga tamekwa okuza omumvo gwa yi oge li pokupwa, noga tegelelwa okukala ga pwa thilu muMaalitsa nuumvo,’’ ta ti ngaaka.
Namwandi okwa totha mo kutya elelo lyondoolopa olya longekidha oomilliona N$9.5 okutunga osasiona yakadhimamulilo momundhingoloko Ehenye.
Okwa li wo a yelitha kutya ondama yomeya ya li tayi tungwa kOmpumbu, nelalakano lyokugandja omeya ga gwana kaakalimo oya pwa okulongwa ngashiingeyi.
Ta ti, okwa li ya longwa koomilliona N$7.8.
Omugandji gomauyelele mondoolopa yaShakati Katarina Kamari okwa ti, ondoolopa yawo monakuyiwa otayi ka ithanwa dhingi moshilongo.
“Oshindji opo tashi ya, otwa hala ondoolopa yetu yi kale yi na ethano lya opala oshowo tayi gwanitha po oompumbwe adhihe dha pumbiwa kaakalimo,’’ ta popi ngaaka. Ta ti, omimvo dha piti, oya li ya tembudha omalukanda ye ga fala kombinga yimwe, ano kOnawa hoka taya tsikile natango okutembudhila omalukanda galwe.
Olukanda Evululuko mOshakati olwa tulwa pamuthika gwondoolopa, paife otalu ithanwa Extention 15.
“Moomvula ntano twa taalela otwa ipyakidhila okuyambula po omalukanda mOshakati, oku ga tula poondondo dhopandoolopa,” ta fatulula ngaaka.
Ta ti, aakalimo yomomalukanda Evululuko paife oya pewa epitikilo oku ka ninga omayindilo gwokupewa oondokumente yuumwene wevi. “Eyindilo oha liningwa uuna mwene gopolota a futu N$30 mosquare meter.
Okumona ondokumente dhehala lye,” ta ti ngaaka. Kamari okwa fatulula kutya ngaashi ehumokomeho lyu uka komeho nolya fuma ko, oondokumente ndhoka odha simana kukehe omukalimo oku mu yambidhidha noompumbwe dha yooloka monakuyiwa.
“Otwa li twa dhidhilike kutya otwa kala nokuyambula po ondoolopa yaShakati komahala hoka ku na aantu ye na iiyemo yi li nawa oshowo iiyemo yi li hwepo,” ta popi ngaaka.
Ta ti, oya kutha onkatu ya yambidhidhe wo eyambulepo lyomahala hoka ku na mboka ye na iiyemo yi li pevi lela nenge kaaye na iiyemo yasha.
Ta popi ta ti shika natango oye shi ningile ombinga yimwe yUupindi. Ta gwedha po kutya oye li momusholondondo, onkene kehe olukanda mOshakati otalu ka mona omauwanawa oshowo eyambulepo.
Kamari ta ti, omalukanda ngaashi ombinga yimwe yolukanda lwaPohamba olwa tulilwa po nale omayakulo gamwe, ngaashi olusheno.
vkaapanda@nepc.com.na