Ovahongifkola hava longo keefikola ndi li moshikandjohongo Onghumbula moshitukulwa shaShikoto ova hokolola tava ti ohava nangala mumwe nomayoka omanga vamwe ova tembuka mo meni leenduda, hava nangala pondje shaashi meni ova tila mo.

 Eshi Kundana a kwatafana novahongifikola hava longo meefikola di li momifitu ngaashi moshikandjohoololo Okankolo, Eengodi noshoyo Nehale lya Mpingana, ova hokolola tava ti peefikola davo kape na omaumbo ovahongifikola naapa pe na, omaumbo ina a wana, nashi oshe va fininika opo va dengele omaumbo oipeleki, hano oubashu moluumbo lofikola.

Ova hokolola kutya omwedi wa dja ko mofikola imwe okwa li mwa dipawa eyoka lonoka, la hangika ta li kunghula neebashu davo.

Omudo wa djako kofikola Elondo Combined School moshitukulwa shaMusati okwa li kwa lopotwa omayoka a hamhano a ponokela momaumbo ovahongifikola moufiku umwe.

Umwe womuhongi kofikola i li moshikandjohoololo Okankola okwa hokolola ta ti Omaandaxa okwa ponokelwa keyoka lemu fitikinina monduda yaye. Ta ti molwa oumbada okwa faduka po.

“Onda uda ashike oshinima tashi ende monduda yange, eshi nda temako mboli eyoka.  

Onda ufana novahongifikola vakwetu opo ve uye va yambidide nge okudipaa eyoka,” ta ti.

Okwa okudja opo okwa ka waimina vakwao ovo hava nangala pondje pomatakashe pondje, opo hava nangala noiti pomake, va nangela omayoka.

Omuhongifikola womulumenhu ha longo ofikola moshikandjohoololo Engodi okwa hokolola ta ti ihava kofa vali va manguluka ngeenge ve li meebashu davo, omolwa omayoka neendje.

“Paife otwa i ka oku li punguluka nomayoka shaashi ka tuna a pa hatu uka. Oilonga oya pumba paife onghee otuna ashike okukala hatu longo momifitu no nande tuna oupyakadi,” ta hokolola.

Omuhongifikola umwe okwa weda po ta ti ounona vavo navo ove na omhito yokulika komayoka shaashi vati omafimbo amwe ohava kala ve kwete omayoka ngeenge ve li pondje ile meni lobashu.

“Okwa li nda hanga okaana kange ke kwete eyoka ke li koshi yomuti. Ounona vetu paife otwe va twala komaumbo shaashi otwa tila,” ta ti. 

Ova hongifikola ova weda po tava ti ova taalela yoo vali eshongo lomeva shaashi va ti omafimbo ohava ka teka momifima ngeenge eendoloma domeva odo have twelwa da pwa.

Ova pula epangelo opo li kale tali tale tete ovahongifikola hava longo momifitu shaashi ovo unene tava mono oixuna.

Eshi a kwatafana naKundna omutalelishikandjohongo mOnghumbula Herman Hangula okwa koleka oshinima eshi shomayoka peefikola.

Hangula okwa ti omayoka okwa ninga aahapu momifitu unene tuu ngeenge kuhe na odula oha dimo auka meebashu dovahongifikola.

“Ngeenge hatu shingi oufiku ohatu shakeneke omayoka mahapu taa tavakana meendjila,” ta ti.

Okwa weda po ta ti omhumbwe yomaumbo ovahongifikola oi li  imwe yomomashongo a taalelwa keefikola moshikandjohongo shaye. 

Omupedu minista mounisteli wehongo Faustina Caley okwa ti oshimaliwa ina shiwana osho tashi imbi ouministeli u kale wa tula omayakulo elixwa po peefikola.

fhamalwa@nepc.com.na