Ehangano lyiikwamina Rossing Uranium, olya yambidhidha uukomitiye tau ungaunga nefundja miitopolwa yokonooli mbyoka ya dhengwa kefundja okuza omwedhi gwa yi noshimaliwa shi thike poN$300 000. 

Ehangano ndyoka okwa li lya yambidhidha ngaaka sho iitopolwa yomonooli Oshana nOhangwena ya kala nokwiindila omakwatho moshigwana konima sho yamwe yomaakalimo miitopolwa mbyoka ya tembudhwa momalukalwa gawo omolwefundja. 

Efundja olya hanagula omagumbo nomapya ogendji miitopolwa moka iyali, aanona yamwe oye li momagumbo omolwameya ga teya po oondjila. 

Omukuluntu mehangano lyoRossing Uranium Johan Coetzee okwa ti, oya kala nokulandula oonkundana kombinga yEfundja nankene oshigwana sha longelwa kefundja. 

"Shoka okwa li she tu kuthitha onkatu opo tu kundathane nkene tu na okuyambidhidha oshigwana sha taalela uupyakadhi mboka,’’ ta ti ngaaka. Ta gwedhwa po ta ti, itaya vulu okukala ya tala Aanamibia aakwawo ya taalela uupyakadhi wu li ngaaka, ihe itaya yambindhidha mpoka taya vulu. “Shika natango otwe shi ningi omolwambepo yuukuume nohole pokati komuntu nomuntu,’’ ta fatulula ngaaka. 

Omuprimaminista Saara Kuugongelwa Amadhila sho kwa li ta taamba ko otyeke yoshimaliwa shoka okuyambidhidha uukomitiye mboka, okwa li a holola olupandu. “Otatu pandula shoka ehangano ndika lya ningi okuyambidhidha oshigwana sha taalela uupyakadhi pethimbo ndika,’’ ta pandula. Ta ti, shoka oshiholelwa oshiwanawa okulandulwa kukehe ngoka ta vulu okuyambidhidha. 

Oshiwike sha zi ko omagumbo ga thika 48, ngoka ga li ga tembudhwa mOshitopolwa shaShana okwa li ga yambidhidhwa kehangano lyOld Mutual. 

Okwa li ya pewa iikulya, mwa kwatelwa uusila, omagadhi gokulya, oondooha dhoohi, oosopa, iikwamagadhi noothewa. 

Natango oya pewa ootenka dhomeya dhi li ntano oshowo omiti dhokwoopaleka omeya ga kaka. Ayihe okwa li ya kotha ongushu yoshimaliwa N$45 000. Ngoka kwa li a kalele po ehangano lyOld Mutual, Mignon du Preez, okwa ti oya li ya yambidhidha ngaaka oshoka oya itaala mokugandja moshigwana, ngaashi naanaa oshigwana hashi ya yambidhidha. “Elalakano okukwathela mboka ya adhika ombaadhilila kuupyakadhi womeya gefundja, nayamwe oya kanitha oonzo dhiiyemo yawo, onkene oshidhigu kuyo okugwanitha po oompumbwe dhakehe esiku,’’ ta ti ngaaka. 

Okwa totha mo kutya natango oya yambidhidha wo oshitopolwa shaHangwena shoka shi na aantu ya yelulwa komeya gefundja niinima ya faathana naambyoka ya gandja mOshana, natango yongushu N$45 000. 

vkaapanda@nepc.com.na