Victoria kaapanda

Aakalimo yomoshikandjohogolo shaKalongo moshitopolwa shaMusati ohaya lala taya teke omeya ngoka haga ndondo ashike ethimbo lyuusiku. Kansela gwoshikandjohogololo shaKalongo Laurentius Iipinge ngoka a koleke oluhepo lwomeya moshikandjohogololo she, ota ti aakalimo otaya mono iihuna.

“Omeya ngoka ohaga ende ashike ethimbo lyuusiku, ihe otaga ndondo ashike kashona, shoka natango hashi pula aakalimo ya kale ethimbo poopomba dhomeya omanga kwa toka,” ta hokolola ngaaka.

Ta ti, oshinima shika osha ningi ethimbo unene, onkene aanamukunda otaya nyenyeta kehe esiku kutya otaya mono iihuna komeya.

“Omeya oshinima sha simana monkalamwenyo yomuntu. Omeya ompumbwe onene mokati koshigwana, onkene uupyakadhi mboka owu na okukandulwa po ngeno meendelelo,”ta ti ngaaka.

Iipinge okwa ti, oya lopota uupyakadhi mboka koombelewa oonene dhomeya, ihe omukuluntu gwoNamwater okwa li a kwashilipaleke kutya uupyakadhi mboka otau kandulwa po.

Ta ti, oopaipi ndhoka dhi na uupyakandhi oondhoka dhi li pokati kOutapi, Anamulenge nOkalongo.

Onkene otaku tiwa oopapi ndhoka otadhi ya dhi lundululwe opo dhi tsikilwe koopaipi ndhoka dha za kOgongo dhu uka kOkalongo.

Kansela okwa ti onkalo oya nyaikila, ngele oshigwana inashi teka omeya ethimbo lyuusiku nena, omutenya momagumbo itamu kala omeya.

“Otatu indile aanambelwa taya ungaunga nuupyakadhi mboka opo ya tule ombunda moshihwa ya thike mbala, opo ya kandule po uupyakadhi mboka wa taalela omikunda adhihe ne,” ta indile ngaaka.

Omeya ogo omwenyo. Joshua Shipepe gomoKalongo okwa ti, oya ningi ethimbo taya nyenyeta omeya, ihe kasha ivule.

“Ohashi tu ehama onga aakwashigwana. Katuna shili oonkondo dhoku kandulapo omaupyakadhi getu, ihe ngele omahogololo oga thiki, otatu simanekwa,”ta ti ngaaka.

Ta ti, omaupyakadhi gomeya, omalusheno nenge elongo, ohatu uvanekwa kutya itaga holoka ngele otwa hogolola aaleli yeli mondjila, ihe otwafa ashike hatu tenteke uudhigu kuukwawo.

“Oshike tu na okumona iihuna yi li ngeyi, omeya inaga pumbwa okukala ga kolota moshigwana, ngele kandi na iikulya ihe ondi na omeya, ongula oku na ashike okusha,’ ta fatulula ngaaka.

Maria Shinedima gomomukunda Ondiikela okwa ti, onkalo ohayi ya thiminike ya hupe omeya momithima, oshoka ohaya ende oondjila onde oku ka konga omeya.

“Oshike omeya ge na okweenda ashike uusiku, uuyuni mbuka kawu shi we wetu, ohatu kala tu na uumbanda okuningilwa omiyonena ngele tatu ka teka omeya uusiku,” ta nyenyeta ngaaka.

Ta ti epangelo nali ya yambidhidhe meendelelo.

– vkaapanda@nepc.com.na