Rundu- Vasingi wono Taxi modoropa zaRundu kava kere nelyatero lyopampora nkera omu vana kara norutjegenyo nombunga vana kutumbura asi Namibia Public Passenger Transport Association (NPPTA), ezi vana hara asi zitundemo modoropa ezi morwa kuna kurugana yirugana pwahana asi paveta. Vasingi ava kavatente asi awo kuna kuyimona asi ava vana kara nononkondo mokugava nombapira pulisiro kuna kara ndango zodoropa zaRundu.
Masere govasingi notaxi kavakere tavalyatere mononzira daRundu nomaplakate vana tjanga omu vana kulikida runyegenyo rwawo kuhamena NPPTA, ezi zakara asi kugendasa pamberewa notaxi dokusika ko 800 modoropa.
‘’ Vasingi ava nonomora dawo edi dadivikwa asi dosiuhenga, vahepa kudifutira kondango zodoropa zaRundu. Kutunda nye apa, kuza komeho, kapi natuhamena hena konombunga peke tatu kara nye tupu nondango zodoropa,’’ yimo zina kutanta mbapira vana tjanga peplakate eli kavageve kwanguuru gomukunda Kavango zoupumezuva, modoropa zaRundu nkera. Vasingi notaxi ava kavahundilire ndango zodoropa zigenderere kutulisapo elikwamo eli yipo vayatjangese notaxi dawo. ‘’ Ose mosirongo soudemokoli tuna kara. Twakara nouhuyungiro wanyamwetu, nepu kapi ono kara asi kuna kulirwanesa noveta. Ose ngesi kuna horowora nye ndango zodoropa zaRundu turuganene kumwe nawo. Ngovasingi notaxi tuna roroka kuruganena kumwe nonombunga dokulisiga siga nye kwato mauwa atugwanamo,’’ yimo zina kutanta ngoso mbudi zawo patjangwa.
Awo simpe kavatente asi momvhura awo kufuta N$1 400 mokutjangesa ntani yirugana yimwe nye kwato uwa nampili wonkandi avagwanamo ntani mbunga ezi kapi azi vasikamenepo nepu vana kara noudigu. ‘’ Ame kuna tumunge niyatambura mbapira zeni zorunyegenyo, ntani kuna kumutantera asi nazikasika oku muna zitambesere, kuna kara asi komberewa zomukurona godoropa ezi. Mpandu, yimo ana kutanta Sam Nekaro, ogu ana kara asi munamberewa kurona koruha royimaliwa ntani koIT mondango zaRundu.
Konyima nye zokutambura mbapira ezi, age katente asi vaturamo nare egano lina kutanta asi vanahara ndango zodoropa zaRundu zikare zina kugendesa elikwamo eli lyono Taxi. Nye nampili ngoso tanko kwali sikameka karuwo gona. –jmuyamba@nepc.com.na
‘’ Ame nahepa nye kukatara koruha oru yawapera nikatare asi kupi vana kugendera, yimo ana kutanta Nekaro.
Age simpe kazire komeho nokutanta asi apa nye ndango zatamekere nelikwamo lyangesi, komeho vakalisikameke, Ose kwaruganesere nye omu avayirugana moVenduka, nose kwahere asi turugane moomu ava yirugana awo. New Era kapi kayimutompokere mokugwana nkumbu ko NPPTA , unene komunasipundi gwawo komeho nye vakahanese mbudi zangesi. –jmuyamba@nepc.com.na
Wokupira kuhafa…. Vasingi notaxi womoRundu nkera kavageve mbapira zawo zorunyegenyo kwaNguuru ntani ndango zodoropa omu vana kusivana mbunga ezi zakarerapo no Taxi modoropa, ezi vana kutanta awo asi kuna kuvaninkiliramo vakara woruhepo. Efano: John Muyamba.