Bravery Kabula

Namibiab ǀAwa!namn di Inspekter Xenerali, Joseph Shikongob ge ǀgaisa !khâikhomsa !hūb a ǂhabase hâ ǀawa!namn !oa ge sîǂui, ai!gû ra ǀhapiokaisens, ǁîn di !oabade ǂhâba hâ  ī ra ǂkhawadīb !nae!khaidi ǀhûhâsiga xu ra hā ǁaeb hoaban auton !nubusib ǀhapiokaisens ǀkha ǁîn ǂhâbahe hâpa sī tama ra is ǂnamipe. Zambezi ǀkharib ǁ­gab ge ūhâ i saris !nâb ge ǀawa!namna gere gowaǀî soab aib ge shikongoba ge mî, auton !nubusib nēsi ǁnaetib ase ǀhaiokaisens ase go hāsa tsîn ǀawa!namna nî ǀû !khaisa, ǂkhawadīb !nae1khain kara !nurihe ǁaeb hoaba auton a ǀkhai !khaisa ǀhapiokaisens ase sîsenūsa. “ǁNāpa i ge omkhôaǂgâs mâsiba go !nurihe, ots ge satsa auto-i a ǀkhai ti ǀhûhâsib ǁanina ra !eream. Tare-ets auto-e ǂhâbaba hâ? Tare-ets nî dī-ūse?, tib ge gere dî.

Nē dîdeb ge Shikongoba Katima mulilos !nâ gere dî, xaweb ge !gāsa kai !khais ge nē mâsib Namibiab a ǂhabase ra hō!âhe !khaisa.Hoa !kharaga ǀhûhâsigu, kai!ā tsî !garo!āse hâgu ge !nuei!nāde !nuri hâ mâtikō gaxusen ǀawa!namn xa oe-amhesa ra !âu !khaisa, !gōsase !uiadi !nâ. Ai!âb noxopa ǀawa!namna gere hōhō!nâ !khais ge, ǀhûhâsigu ­ǁanin īǁoa mâsigu !nâs tsîna ra dītsâ !khaisa, hâ go ǂkhawadība !nurisa. ǀNî !nāden ge kaise !nūseba xu ǁîs a ǀgū ǀawa!namn beros ­ga ra ǀnobasī, tamas ka i o ǁgariǁgarisa mâsi-i !aroma ra !âi, xawe !eream-i a ǀkhaise. Nēti ī mâsigu tsî !nae!khaidi ge ra !aroma hûhâsigu ǀawa!namn !nâ ǂgom!gâba !aruǀî ūhâ tama tsî ǀawa!namna xū tamase ra mû !khaisa. ǁÎb ge berodi danana ge ǁguiǂam, !ereamxasiba ū tsîn nî hâ a auton tsî xūna ǂâuǀoasasib !nâ sîsenū !khaisa. ǀUnis aib ge Shikongoba ǁnaetib ase go hâ 1khais tsî ǀawa1namn auton !nubusiba !hūb a ǂhabase ūhâs diba ge !haraxū. Zambezi ǀkharibab ge aiǁgause ū tsî gere ǁgui!ā, 97 autonan ūhâ tsîn ǁîna xu 27 autona aibe a ǂgaeǁnâsa !gâi!gâidedi ǀkhan a ǀhawe-ūhe !khais !aroma. ǁAupexab ge nē ǀkhariba ǁkhaisa ǀasa autode nē kurib !nâ ge !khō!oa. ǁNā-amaga i ge ǂhanu tama hâ auton a ǀkhais di ǀhapiokaisens noxopa nî sîsenūhe !khaisa.