!Hūb di ǁÛs, Netumbo Nandi-Ndaitwahs tsî De Beers !Nans di Dana Sîsenǂuira Mâisab, AI Cooki, ge ǂoa ge wekheb di Donertaxtsēs ai !Hūb Oms tawa ge sari hâ I, ǁgariǁgarisa tsî !hae oresa ra ǂhâba ǁgamǁarede !Hūb di ǁûs ǀkha nî ūhâse, !hūb di ǀnoreǀuin ǂharugub ai!gû ra ǁkhaeheǁoasa ǁgâiba !augaba xu hōs tsî ǂharugub !gâise !gû tama !khaisa ǁîs ǀkha ǀgoragus ase. Nē !gam ǁgamǁares ge ǂâisa mâtib ǂhanuba De Beers ǀkha ǀhao hâse nē ra khâi ǁgoaǂuidi ǀnoreǀuin !âba !gâi tamase ra tsâǀkhādi, ǂharugub !nâ ǂgomǁaposasiba ūhâ tama is, kaise !gom!gaoxa texnise !gomsin, ǀgapi ǂganǀgaub enerxib dib tsî loxistikan ǀkha ai!gûsa ra !hâumâi mâsigu tsîn ai nau hân xōǀkhā ge ǂnûi hâ i. ǀGaisa mâsib hîa ǀnoreuina ǁamas ai ge hâb, 2022ǁî kurib !nâ tsoatsoa tsî 2024 kōse ge ai!gûb, ge kai tsûadanab ase Namibiab tsî ǂgui !kharaga !âǀhuru-aon nē !âb dina hoa !hūbaisise ība. Nē ǂnûs ge ai!gû ra ǀnûgus ǀnōsa tama ǀnoreǀuin ra ǂgâxa-ūs ai ǀgui ge ǂâi-aiǂnûi tama hâ i, xawe ǂharub !nâ hâ !gomsin tsîna gere !hoaǂam.

Nandi-Ndaitwahs tsî Cooki hâra hoara ge ū mîǁguib ge, ǂōrisa sîsenǁareb !hūgu ǂgaeǂguira ǂhanugu tsî ǂharugub !âǀhuru-aon ǁaegu hâs nî ǁkhāsib, ǁîn ūhâ ǀnōb ai ǂanhes tsî !khōgara ǁkhās ǀnoreǀuin disa ­ǁapoǁapo !khaisa. !Hūb di ǁûs ge De Beersa ǁnā ǁaposasiba ǂhanub di ǁguiǂgāsens ǂnamipe mā tsî ge mî, gaxuse ǂhanub tsî De Beers hâra ǁaegu hâ sîsenǁareb !hūb sâuǁkhāsib !aroma ǂhâǂhâsa !âsa ra ǀhuru !khaisa, tsîs nē ǂnûsa ai!âb ǁga sîsenǁareba ǀgaiǀgais ǀguisa hî tsî !gâi tsî sîsenxa dīǀgauga ais khāb ǁga nî sîsenūsa, ǁgūbas âna sī!nâs ase. “Sida ge Namibiab di ǀnoreǀuina United States of Americab tsî !hūbaib ǂhabase ǁgoe !hūgu ǁga sī-ūtsî ǁîna Namibiab ǀnoreǀuin di ǂhôasa kai ǂnīsasib ǀkha ra ǁgaeba,” tib ge Cooka ge mî. Ai!âb ge ­îba a mîs ge, ǁîn ra ôa-amsa, Namibiab !uru ǀnoreǀuina ǂhunuma tama ǀnoreǀuin hîa nēsi !hauxase hoa !hūbaisise ra hâmana xu ǀonasa, !kharagagusib !gāsase nî ǂoaxaga. Cooki ge ǀams ai Nandi-Ndaitwahs ǀkha ge hâ i ǂnûsa, kaises ge ǂûǂûxa ise ge !khō!gâ.