■ Otniel Hembapu
WINDHOEK – Omudhani gwaNamibia Benson Shilongo okwa shaina okontalaka nosipana yaEgypt – Ismaily SC, konima sho osipana ndjika ya li ya landa ko okontalaka ye koSmouha. Omunamimvo 27 nguka okwa li a waiyimine oIsmaily okuza koSmouha mekende lyomapingakanitho gaadhani lyopakathimbo. Ashike konima sho a li a ulike uupyu muudhano 26 mboka a dhanena Ismaily, a tula mo ookoola hamano nokugandja omatanga gaheyali ga ya mo moshikakomumvo shuudhano she shotango noIsmaily, omanyakwa ngaka ga sindana oliga yaEgypt iikando 3 oga tokola ga lande ko okontalaka ye koSmouha notayi ka mona Shilongo ta kala kosipana hoka uule woomvula ndatu. Shilongo okwa okwa li a waiyimene oIsmaily omvula ya za ko koshimaliwa shoomiliona N$3,5 okuza koSmouha. Manga a li inaa ya koSmouha okwa li ha dhanene Al Assiouty Sport moliga yopombanda yaEgypt. Okwa dhanena wo oPlatinum Stars yaSouth Africa osho wo Gaborone United yaBotswana.
Shilongo, ngoka a dhanena oBrave Warriors iikando 24, okwa li wo oshitopolwa shosipana yopashigwana kekopi lyiigwana yaAfrica (Afcon), ndjoka ya li ya dhana nomandangalati muAfrica ngaashi Morocco naIvory Coast.
Okwa dhana uudhano uyali koAfcon, sho a dhana naSouth Africa naIvory Coast. Namibia okwa li a dhengwa momaudhano agehe gatatu, moka a tula mo ashike okoola yimwe ye ta tulwa hamano.
– Kingfut.com