Kae Maṱunḓu-Tjiparuro
Oswanu ya Namibia i rikamwaha okurikuta epango uriri ku novira vyarwe ndoovazu vi nongamburiro tjimuna indji oyatjo ya “sosanyo pao kuvanyo”.
Okaṋepo kOswanu Kambahee Hijakaere wa tjere nao pomazemburukiro wotjiratjoporotika hi, tji tjiri tjimwe tjovira ovikuru vyoporotika mOnamibia, ndoovazu otjo kaatji kurukuru. Ombura ndji mai yende mOnamibia otji mu nomatoororero wOtjiwaṋa, ngeri wokutoora ouṋepo ouhaame mOmbongarero yOtjiwaṋa, nowomatoororero wOperesidenda yehi.
Oritjatatu nda zuko tji yari 27 komueze mbwa kapita, Ndengaṋi, otjira tja kwaterwe posi ya omukandi wongwatero yatjo wa zemburukirwe Oroviungura. Otjo tja utwa mo 1959, ndji ri ombura yOndjembo yOruvanda indu ovandu o 12 tji va yahwa i yoporise yohoromende yOmbandu yotjivara (Apartheid), ya South Afrika ovandu kehi younane wOswanu tji va panḓa okutjindira kOkatutura okuza kOruvanda, ndino ndi ngeri omaturiro inga Ohochland Park mOtjomuise.
Otjehi nda kuramenwa omatoororero ombura ndji mai yende, ovira vyoporotika vya utu okuripurira kepango romatoororero posi ya ngunda tji tji hi ya rira otjiṋa tjoporwara nungwari tji tji unaunwa uriri otjondando kombura ndji mai yende. Ehi eraranganda na Namibia omueze mbwa zuko ra karere nombongarero yepango komatoororero mehi ndo ombura ndji mai yende. Ndi ri epango rokuherura Oafrikan National Congress (ANC) komananeno. Ndi he ri epango rovira ovingi mbi hi noumune poo ozondando zemwe.
Omambo wa Hijakaere mape ya maye zu mongaro nai ndji ri po mozongomainde ozengi nḓe hi notjira tjimwe tji tji honaparera po nu ovira ovingi mbya kwatasana epango rokuzenana ape kara omauzeu tjinene wovira mbi nanasana ape ngandu ozongomainde inḓa tji za remana momaunguriro wazo noviungura kovature vovirongo aze ha vasisa oviungura ovature mbi ve hepa nawa otja pu za sere okuungurira.
Pomazemburukiro nga movengi pekepeke, pa ri ovakurundu pekepeke vOswanu okuza kEpukiro, ovarwe ovakuru na wina Operesidenda ndja ri po nu nai ngamba nguri okaṋepo kOswanu mOmbongarero yOtjiwaṋa, Onongo Tangeni Iiyambo.