ONGWEDIVA- Petrus Hashali Shailemo omunamido 72 womomukunda Oshaango mOshitukulwa shaHangwena vati oku li moumbada shaashi ta ningilwa omatilifo edipao kovanhu vamwe vomumukunda wavo.
Shailemo okwa hokololela Kundana nghee vati mwene womukumda wavo Jafet Mwashekele vati naye a koleka kutya ota dipawa.
Ashike omukalelipo wamwene womukunda Lukas Nangolo ekela shi odo tadi popiwa kuShailemo ta ti omukulupe oo oha dengwa shaashi oha tuku ovanhu momukunda. Okwa ti Shailemo okuhole okutokelwa meekamba, yee shima a nu mo oha tameke okutuka ovanhu.
“Mwene womukunda ine mu ula kutya ovanhu otave mu dipaya shaashi inave mu hala, ashike osheshi e hole okuvatuka,” Nangolo ta hokolola.
Shailemo okwa hokololela Kundana kutya okwa li a ifanwa koomwene womukunda shi na sha nolopota ei pele Mwashekele inasha novanhu ve mu ponokela tave mu denge nokumunyeka oinima yaye.
Okwa ti yee ota danwa po okatanga, shaashi vati ovanhu ava have mu nyeke oinima yaye noku mu denga vati ove li elyenge limwe namwene womukunda shaashi ote va popile.
Okwa twikila kutya ovakulunhu vomukunda wavo inave mu hala molwaashi oha popi oshili moyoongalele yokumunda, unene ngeenge tashi ya poulingilingi hau longwa kovakwateli komesho vomukunda ngeenge tava yandje edu.
“Ngeenge handi popi oshili ohava kala noku ula nge kutya ohandi popi oipolopolo shaashi vati ohandi kondjele omukunda. Eshi ohave shi popi shaashi ondali hamushanga womukunda odula imwe, ndele kouhamushanga handi diko. Ame itandi kondjele omukunda shaashi itandi u dulu. Onda uda yoo hau futwa oimaliwa yonhumba oyo ndihe na apa handi ihange ngeenge onda ningi mwene womukunda,” Shailemo ta ti.
Okwa ti yee okwa loloka ashike okukala ta hepekwa unene tuu ngeenge tashi ya pokunyekwa oinima yaye ngeenge ai kodoolopa.
Okwa ti yoo iha kala vali omanguluka, molwa oshiningwanima sholudi eli.
taimihaihambo2000@gmail.com