WINDHOEK – Mwa nako yeo maofisa ba Likolo la Litekisano ni za Bo Mapangapanga (Ministry of Trade and Industry) ba Namibia niba Naha ya Mboela wa Afica (South Africa), hamoho cwalo ni maofisa ba babona za limunanu (Veterinary Officials) ba linaha ze peli nenze ba patehile mwa lingambola mwa Windhoek maabani, Likwambuyu wa Likolo la Njimo, Mezi ni Mishitu, Mutompehi John Mutorwa u tiselize kuli Namibia ina ni tumelo ya kuli Mbuwana haitaba ni mazazi a lishumi (10 June) mazazi a nafilwe kuli kube ni lingambolo ka za mayemo a matuku a yambukela a limunanuka za litekisano za kwande anaha ya Mboela wa Africa za limunanu zepila mwa nako ya cwalo.
Sunda yetaha la Bubeli mikwa yeswanela ya misebelezo (Standard Operational Procedures) itabe iamilwe kuyona kanako ya lingambolo mwahali a mutai wa Njimo, Mishitu ni Buyambi ya naha ya Mboela wa Africa ni katengo ka Namibia ka kabona za litekisano za kwande anaha za limunanu ze pila, ni bao baitingile mwa litekisano ze swana. Mutorwa na amile fa taba yeo la Bulalu nako ya naikambota kuamana ni lipilaelo za litekisano za kwande anaha za limunanu ze pila, zeo litisizwe ki milao ye minca yesa lumeleli litekisano zeo, mayemo ao atisize balitekisano za kwande ba mwahali a naha kusinyehelwa bo lule ba madolasi kazazi. Na ize ki mayemo a zibahala ni tumelo ya Namibia ka nako ya cwale, ku lumelelana ni mutai wo bona za Njimo, Mishitu ni Buyambi , mi likolo lahabo liitamile kaluci kufumana tatululo kuli Namibia itateke litekisano za limunanu zepila kwa naha ya Mboela wa Africa.
Mutorwa na fa likalabo lwa makalelo kuzwa ngambola ya pili mwa hali alinaha ze peli zeo mwa kweli ya Kandao anena ni mazazi a ketalizoho ka mazazi a mane, (9 May). “Ka nako ya cwale nifitisa buitumelo kwa balikani, ni ma ofisa ba tutengo totubeli ni naha ya Mboela wa Africa kualabela kwa pizo ya luna kuli luine kakutalimana kuikambota, nibaňoli ba babainelezi (permanent secretaries) ba Likolo la Njimo, Mezi ni Mishitu (MAWF) ni Likolo la Litekisano ni za bo Mapangapanga (Ministry of Trade and Industry) bao ba etelezi linumwana.” Mutorwa naikopanyize ni bayemeli ba Katengo ka Nama, tutengo totuyemela balimi ni ma ofisa ba Likolo la Litekisano ni bo Mapangapanga la Bulalu sunda ye mwa Windhoek kulika kukutiseza fafasi mayemo a maswe alitekisano. Mayemo maswe abile teni nako yeo milao yeminca ya limunanu itateka kweli ya Mbuwana haiba ni lizazi liliňwi (1 May). Kacwalo muuso wa naha ya Mboela wa Africa u sepisize tatululo ya silikani kanako ya lingambolo ze lelilwe ku fweka sunda ye taha la Bubeli. Linumwana zezwa naha ya Mboela wa Africa, zengelela ni lichaziba mwa limunanu lifitile mwa Windhoek Maabani kuto ikambota kakutala ni bahabo-bona ba naha Namibia. Lingambolo lilelilwe kuungula ni kutisa miselo yeminde kuba Namibia ba litekisano za kwande anaha za limunanu ze pila.
Kakuya ka muňoli ya inelezi (Permanent Secretary) mwa Likolo la Njimo, Mezi ni Mishitu, Mutompehi Joseph Iita, u ize, kwande amikwa ye swanela ya misebelezo, katengo ka swalisano ka swanela kutaha ni milelo ya kutateka kamo mikwa ye minca ya makete ya limunanu ikona kualuhanywa, ili kuli ikone kusebeza feela kwa limunanu ze lekisezwa kwande a naha ili za kuuta.
Sepo ya balimi ba Namibia kiya fa likoshi mo bolule ba madola asinyehile feela mwa balimi ba limunanu, ko palo ya lipesenti zefita fa 70 % ya sichaba sesifita fa 2.2 million baitingile bupilo bwa bona kusona simbule seo. Mutorwa u ize, zenehatisizwe kwa mukopano wa kwa Pretoria kweli ya Kandao anena ni mazazi a ketalizoho ka mazazi a mane (9 May) nekulumelelanwi kuli lingambolo lifite kwa mafelelezo a kweli ya Kandao aina ni mazazi a mashumi a malalu ka lizazi lililiňwi (31 May). Lipiho ze nehatisizwe neku ňozwi kuli katengo kabo chaziba nekaswanela kukopana kufeleleza mikwa yamisebelezo ya ma pemiti a mabeli kwa maneku kaufela.
“Muhabona, nina kasibili, ni balile ni kunyakisisa liňolo la Mutai wa Njimo, Mishitu ni Bundui (DAFF) lakweli ya Kandao anena ni mazazi a mashumi a malalu (30 May). Luikolwisize kakutala ni kuutwisisa seo bahaboluna basitokwa ni seo basieza ni zeo bahupula kueza kufitela kutatafalisa lika ni kukopela- kopela sifumu.