Aaholi yokukwata oohi osho wo mboka ye hole oohi, oya hiywa opo yi inyolithe methigathano lyoohi ndyoka tali longekidhwa okukala ko mehuliloshiwike shopaasa. 

Omathigathano ngoka otaga ka kala ko momasiku gane gaApiilili nuumvo, taga ka ningilwa kehala lyomayinyanyudho tali ithanwa Mavinga Lodge and Campsite, koRuacana moshitopolwa shaMusati. 

Ehala ndyoka tali ka ningilwa omathigathano olyi li kooha dhomulonga omunene nomwaanawa, lya dhingolokwa wo kuushitwe, ko ku na wo aantu yomuhoko gOvahimba mboka taya ka mwenyeka wo oshiindingili shoka. Omuwiliki goshiindingili shoka Joyce Paulus, okwa ti ompito ndjoka oya patulukila kehe gumwe e na ehalo lyokukutha ombinga methigathano ndyoka. 

“Ompito ndjika kayi shi ashike yokukwata oohi, ihe oyokunyanyukilwa pamwe, okut s e yathana osho wo okulongathana nokukundathana nkene ye na okuhuma komeho, ano otaya ka ilonga oshindji,” ta fatulula ngaaka. 

Paulus okwa ti aakuthimbinga oya tegelelwa ya thike Etitano opo ya longekidhe nawa esiku lyoshindiingili, shoka tashi ka kala ko mOlyomakaya. 

Okwa gwedha po kutya aakuthimbinga natango otaya ka ya methigathano lyokusindana okatekete komahooli. 

“Mboka taye ya pamwe naakwanezimo yawo, otashi kala ompito ombwaanawa oshoka ehala olyi na uushitwe tau hokitha, osho wo oshindji taya ka hokwa,” ta fatulula ngaaka. 

Pulus okwa popi wo kutya oye ya po noshiindingili shika, oshoka oya mono aantu oyendji ye hole okukala taya kwata oohi pooha dhomeya, unene pomilonga. 

Ta ti osho nee a hala okugandja ompito ndyoka opo ye ye pamwe, yo ya longathane shoka taya vulu okutopolelathana. 

-vkaapanda@nepc.com.na