I Mbatjiua Ngavirue OTJOMUISE Ondiero yo NBC oku mwinisa omirari vyo ratio imbi otjiwana mu tji tjitona ozongoze okuyandja omaumune watjo peke peke ngutjina ongendo nawo tjimuna o Chat Show, Open Line, Ewi Lyamanguluka na Tjirimeyo yaya kurwa omwano peke peke. Ovandu tjiva vayakurire ondiero indji na vei kumwe no unepo wOndjuwo yOzoveta owingi kutja ovatone vozongoze komirari imbi vepita mondjira nu vevitomba no kuyambururrira mo ovakwao. Varwe ma vemunu kutja omukambo imbwi oo mautiro wondjandero ya imwe yozongunde zouyara ozoseinina yo kuyandja oumune oupupurukwe. Imba mbu ma vepirura ondiero indji mave munu kutja omatonenno wozongoze ko mirari imbi ohepero kotjiwana okuhungira ouhara otja tji matjivanga no kuhungira oupaturuke kutja ouyara unyomoke. Ohepero onene yo mirari imbi vi yandjera ovandu va kauriri okupendura omapu wongendo ngatja heyeya komatui wotjiwana. Muwo muna omapu okuza kozombokoto zehi ngehavaza komatui wo vawonge vozombuze kutja ovo NBC na varwe. Otjiveke tjitjazuko o Ministera yOndjivisiro nOmapitisiro kOmbepo, Netumbo Nandi-Ndaitwah, watjivisire kutja ounane wo NBC watiere okurundurura omirair imbi kutja nambano vi hungirire kepu rimwe uriri. Nandi-Ndaitwah watjere ondando yondiero indji okutjurura omatombero wavyo posyo aharaisa kutja ondiero indji maiya rune mo maunguriro. Otjiuru tjo NBC, Vezera Kandetu, wa yauzire omukambo imbwi posyo apatana kutja va ninikizirwe iyopolotika okutjita nao. Watjere tja za no ku kambura otjihavero ihi omieze ape omurongo mbyakapita pavazewa ombata ohunga no kuhina ondengasaneno. Pari ombata ohunga no kuhina ondengero ku ngwari o Presidenta Onongo Sam Nujoma nawina ohunga no ma kwekurirasaneno yOvambanderu. Otupa peke peke tua kwe kurura o NBC kutja iyandjera ovandu okuyamburura ovanane vopolotika nombazu okupitira mo mirari vyayo. “Ami mbari kombepo netja omirari imbi ngavikaende komurungu nandarire mo kuhina ondengero nokurisa oundu kumwe kovandu,” watjere. Okuzambo pari no zongaro peke peke zouwa nouvi. “Ongaro ouhumandu ndji tunayo okoo kutja muna ounepo mo tjiwana mbutjaterwa okutomba omirari imbi no ku yamburirasanena muvyo. Ihi tja tjitua mo mirari vyeti ovingi kamo o Open Line uriri. Mokuriyaruka tue ripurire okutara rukwao motjina ihi natu munu kutja muna omakunino tjinene wo tjivepo otjivi,”watjemene. Kandetu watjere munao o NBC otji ya tiere oku ngunda ama ihanda o Chat Show. “Maze rundururwa na ze tumburwa iyo omapu woharive no tjiwana ma tjiundjirwa oku hungirira komapu inga. Matutjevere ongaro indji noruveze ondu maru tuhongo kutja komurungu matu tjiti vi.” Kandetu kanaa wa i itaverere kutja omaporindiro womirari imbi ya hungamasana nombepo youyara no kuhungira oupaturuke. Ngunda ame pemunika ayo pena omairo wa kumwe kutja ovatone vozongoze vapita mo mirari vyoundu, omapuriro ngeripo mayetja hapo inga omerizirira waune? Ezeva etenga ro zonganda zo zombuze ozengi okoo kutja ozo oruveze aruhe ondasere okutjevera nozongari kangamwa atjihe tji ma zepitisa. Tjiva mavetja omerizirira wo vanane vo mirari imbi okutjevera eraka ehazendu muvyo. Ovanane imba kaveungurisa omasa wao otjovanane vo mirari imbi pupayenene kutja muvyo aha munyondorokere ouhazendu. Motjiwana aruhe ma mukara ovandu ovanauvi mbehina kutjiwa kutja ngaveritjinde vi mo murari vyotjiwana. Hapo ihi otjiwana atjihe tjasere okwiihamwa mena rovandu outiti imba? Eziriro ra Kandetu kepuriro indi ndinondi rarire ovirosoroso.Rutenga waitavere kutja tjiva tjo vavane vomirari imbi ovingundi okuyenena okunana omirari imbi koupwe. Ngunda amazu no kutja nao tjimanga wa tanauka natja ouzeu okutjaera ovatone vozongoze komirari imbi ovatombe mena ro kutja ve nyondorokisira mo ozondjambu ngunda ovanane vavyo ave hiyatjuwa kutja mavevanga okutjavi.