Uunona u li une owa li wa pakele uundjolo niimaliwa mohauto yo 4×4 nokuhinga shaa li paveta uule wookilometa 900 moAustralia. Uumati utatu nokakadhona kamwe, ayehe ye li pokati komimvo 10-14- oya li ya monika moNew South Wales, mondoolopa yedhina Grafton mOsoondaha. Oya li ya thigi po Gracemere yi li moQueensland, kuyele mehuliloshiwike twa zi. Okamatyona kamwe anuwa oka li ka shangele ofamili yako okamukanda ka tye kutya ko otaka zi po. Opolisi oya li ya ti kutya otayi ka patulula oshipotha, ashike inayi popya kondandalunde kutya oshashike naanaa.
Aanona ayehe inaya za mofamili yimwe noya yaka osheenditho shika kugumwe gomaakuluntu yawo, aanambelewa taya ti. Kuyele ongula yOsoondaha, konyala ookilometa 140 mosheendo shawo oya li ya kankama poshitaasi shomahooli nokuyaka omahooli pondoolopa ndjoka yedhina Banana.
Omuniilonga mpoka okwa li a lombwele oshikundaneki shoDaily Telegraph kutya okathano oku ulika osheenditho tashi hingwa manga gumwe inaa za mo a ka tule mo omahooli.
“Omufupi lela, ita adha nopekende nawa,” Omuniilonga nguka ta ti ngaaka.
Esiku olyo tuu ndyoka opolisi oya li ya mono ishewe ohauto ndjika moGlen Innes- ondoolopa yi li popepi noGrafton- noya tameke oku yi landula. Ashike aapolisi oya hulitha po oku yi tidha omolwa omalimbililo kombinga yoomvula dhomuhingi.
Ohauto anuwa oya li konima ya adhika ya kankama komunkulo gwopate moGrafton, shi ikwatelela komunambelewa gwopolisi Inspekta Darren Williams gwomoSouth Wales.
“Aanona mbaka oya li yi ipatele mo mohauto nopolisi oya li ya longitha okatenda okupatulula ohauto noku ya dhitika,” ta ti ngaaka ngaashi sha lopotwa koAustralia Broadcasting Corporation,
Inspekta Williams ta ti osha fa shi li ngeyi kutya mbaka oya kala nokwiiyakulathana okuhinga. Okuhinga pokati koGracemere noGrafton otaku pula konyala uule woowili 10.
“Ondjila onde noonkondo, unene tuu komuntu e thike mpoka,” ta ti ngaaka.
Opolisi tayi ti kutya otayi ka ningila aanona mbaka omapulaapulo uuna aakuluntu yawo opo ye li. MoQueensland aahingi yiihauto oye na okukala ye na oomvula 17 opo ya vule okumona omukanda gokuhinga.
-BBC