Charles Ndeumane
Oshiputudhilo shopombanda shaNUST (Namibia University of Science and Technology) melongelokumwe nuuministeli wuunamapya nuuniimuna, omeya netulululo lyomavi, ehangano lyoKafue Gorge Regional Training Centre, oshowo ehangano lyehumokomeho muuyuni lyoUnited Nations Development Programme osha tula miilonga opoloyeka ya futilwa kepangelo lyaJapan yo kudheula aadheuli kiiputudhilo yopaungomba knene ye na oku dheula aalongwa yawo melongitho nehumokomeho lyiikwamalusheno mbyoka kaa yi na oshiponga komudhingoloko.
Omugandjimayele gwehangano lyoKafue Gorge Mpezilwe Simukoko okwa ti omadheulo ngoka oga gandjwa koshipitudhilo shoNamibia Training Authority oku za muMaalitsa 2024 sigo omomasiku 26 Juuli 2024. “Omadheulo ngoka oga li ga topolwa miinyangadhalwa ine, oshinyangadhalwa shotango osha ningwa mondoolopa yEenhana moka adheuli ya li ya dheulwa kombinga yokunduluka po nokulongitha olusheno lwetango.
Oshinyangadhalwa oshitiyali shopoloyeka ndjoka osha gandja omadhewo gokugamena iikwamalusheno kaa yi pye ngele ku na omalwaadhi. Oshinyangadhalwa oshititatu osha gandja omadhewo kombinga yuundjolowele nonkalonawa oshowo oku kaleka olusheno lwetango ta lu longo nawa. Sha hugunina osha li kombinga yokuandjakaneka olusheno lwetango nosha ningilwa moshiputudhilo shaUNAM Engineering campus mOngwediva,” osho Simukoko a ti. Ngumwe gwomaakwatelikomeho yomadheulo Tobias Nambala okwa ti opoloyeka ndjoka oya kotha oshimaliwa shomiliyona N$1,3 nomadheulo oga pewa aadheuli yokiiputudhilo yopaungomba ye li 37, noopelesenda 21 dhomaadheulwa mboka aakiintu.
“Ondjodhi yetu kayi shi ashike aadheuli yetu ya endele pamwe nehumokomeho miinkwankondo niikwamalusheno shike otwa hala wo ya vule oku dheulilwa uunongo nontseyo yo ku kwatathana noshigwana,” osho Nambala a ti.