Charles Ndeumane
Ehangano kaa li shi lyopapangelo lyedhina Namibia Collaborative Board Association of Namibia olya pititha uuyelele wekano lyoshimaliwa shoka anuwa sha li sha nuninwa oku landa uututa wokomathimbo wuunonakodha wu li moosikola.
Oshiwike sha zi ko omupevipresidente gwehangano ndyoka Ingashipola Lukas okwa pititha omukanda kiikundaneki moka ehangano lya tseyitha kutya oshimaliwa shoondola N$3000 osha yakwa po kiilyo yehango. Anuwa oshimaliwa shoka osha li sha nuninwa oku landa uulapi waakadhona wu yambidhidhe uukadhona mboka wu li mompumbwe.
“Ehangano lyetu olyi lile po oku kwathela oshigwana, onkene ngele iinima yoludhi nduka ta yi ningwa kiilyo yehangano osha simana oku yi lopota opo einekelo ndyoka lyi li pokati ketu noshigwana li ye komeho,” Lukas ta ti.
Onkambadha yo ku ya moonkundathana na amushanga gwehangano ndyoka Meyer Angula oya hulile muunyengwi sho ongodhi ye inaa yi yamukulwa.
Lukas okwa lombwele oshifokundaneki shika kutya nkene oshimaliwa shoka sha kanene amushanga iha yamukula ongodhi ye ngele ta ye mu dhengele.
National Collaborative Board Association (NCBA) ehangano lya totwa momumvo 2020 nelalakano lyo ku yambidhidha aakwashigwana mboka ye li mompumbwe, unene tuu aagundjuka ngaashi aanasikola. Shi ikolelela ku Lukas, oNCBAN oya gandja omakwatho gongushu yoshimaliwa shoondola N$8000 kEngungumano Combined School, Epato Combined School, oshowo kaakalimo yamwe yomoshitopolwa shaHangwena, omakwatho ngoka oga kwatelamo iikulya noothewa, oshowo uulapi waakadhona.
“Ko National Collaborative Board of Nambia otwi itayela kutya kehe okanona kokakadhona oke na uuthemba wo ku pewa uuyele oshowo iipumbiwa yo ku sila omathimbo gako oshimpwiyu,” osho Lukas a popi ngaaka.