ONGWEDIVA – Mayola wodoolopa yaNgwediva Naemi Amuthenu okwa yelifa kutya elelodoolopa ole lilongekida okuyandja edu lonhomenawina kovanafikola ava ve li koiputudilo yopombada mOngwediva, opo va dule okutungilwa omalukalwa avo.

Edu lonhomena eli tali ka yandjwa kelelodoolopa ola teelekika li ka yandjwe oshali, lo li tungwe omukalwa oo vati tau kala u na ondado i li peduelela, a nuninwa okukwafa nokuteta ovanafikola vomomudingonoko ondjilakati ngeenge tashi ya pokufuta eenhele dokuhiila.

“Ongwediva oyo odoolopa imwe oyo i na omwaalu woiputudilo ihapu, omo mu na IUM, UNAM Engineering Campus, Hifikepunye Pohamba Campus osho yo o-VTC,” ta ti.

Okwa twikila kutya molwoiputudilo ihapu ye lihanena odoolopa ngaho, vati ovanafikola ohava mono oixuna, unene ngeenge tashi ya peenhele domalukalwa.

Vahapu ohava kendabala va ye momuhandjo, oo ihau dulu okufutwa kukeshe umwe molwondado, omanga vamwe hava kendabala oku ka konga eenduda dokuhiila komalukanda oko ku na eenduda da fa di na ombilixa.

Vamwe vati ohave lihange tava di monduda va finana mo, opo ashike va dule okulitukulila oimaliwa yokuhiila, vo vamwe tava idililwa kovapambele, ndele komaumbo ovapambele ove li ko ashike vati tava li tava pi.

Umwe womovanafikola hava fikola moshiputudlio shaUNAM Justus Hamutenya okwa ti, eenduda edi da fa di na ombilixa kolukanda dokuhiilwa ohadi tewa neenghono keembudi.

“Ngaashi ame efiku limwe nda dja keetundi, onda hanga ashike onduda yange ya yela. 

Oluhepo olo le tu kufa koumambo tu uye tu lihonge, ashike eembudi daNgwediva oda tokola vali oku tu fiya pomutenya,” ta ti.

Hamutenya okwa ti ngeenge elelodoolopa ole ke va dimbuluka, otashi ka kala lela oshiima shiwa shaashi ova pumbwa omalukalwa e li ponhele i li xwepo.

Mayola okwa ti oshikumungu shokuyandja edu oshoyo oku manifa omatungo aa okuna oku shitula moilonga, nota indile ovanangeshefa vomoshitukulwa osho yo keshe ou ta dulu okukwafa ile okuiwa naye meenghundafana, a mone ombelewa yaye.

-taimihaihambo2000@gmail.com