Auleria Wakudumo 

ONGWEDIVA – Omushikingalo Shiimi Johannes (28) nedina la shivika nawa Lee Boy okwa alukila natango mondabo noalbum ipe hai ifanwa “Onda hala okulonga”. 

Lee boy okwa ti okwa yandja edina ‘onda hala okulonga’ koalbum yaye shaashi okwa hala okulitula mo meengalo daye. 

“Oalbum yange otai tu nge omukumo opo ndi longe noudiinini meengalo dange konima eshi nda taalela omashongo mahapu oo a tula nge pedu nokukala inandi imba oule wefimbo,” Lee Boy ta holola ngaho. 

Otai tu yo ovanyasha omukumo opo vehe litule momalodu nomoinima younyuni vo va lalakanene omaifano avo fiyo tava hange efindano. 

Lee Boy okwa shivika kuvahapu unene vokonooli molwongalo yaye oyo ya andjakana noshilongo ‘om’nona ngo’. 

“Om’nona ngo okwa ningifa nge ndi kale ndi shivike kuvahapu molwounongo wange wokwiimba,” Lee Boy ta holola ngaho. 

Lee boy okwa holola kutya okwa mona kutya oku na oshitalendi shokwiimba mo2018 pofikola yavo pOkatana Sekondele. Okwa ti okwa waimina kwa li ongudu yokwiimba navahapu ova didilika kutya omulumenhu oha ngoola eimbilo moshili. 

Lee Boy nonande a dopa ondodo onhi-12 mo2018, okwa twikila okulihonga koKayec mOndangwa oko a li te lilongele okutunga ashike ofikola okwe i twa okati opo a ka twikile noshitalendi shaye shokwiimba. 

Mo2019, Lee Boy okwa pitifa okangalo kaye kotete “Andi kondjifa moshili”. 

“Okangalo kange kotete oka pwilikinwa kuvahapu noka li taka kwelengedja keshe pamwe. Onda kala yo handi kaimba oshali peenhele di lili nodi lili opo ashike di tule edina lange pombada nokuyambula po eifano lange,” ta ti ngaho. 

Eshi o2020 ye uya, Lee Boy okwa shakena novashikingalo ngaashi Young T, Golden navakwao ovo ve mu kwafela a longele meenhele davo mokuimbila. 

“Eshi okamaliwa ka hovela okukala take uya mo kafa ka kola, onda kanifa ondjila ndele handi hovele okunwa omalodu oo nokuli a twalange moshipangelo,” ta holola ngaho. 

Odula ya dja ko muDesemba, Lee Boy okwa nhukila mostudio noalbum i na eengalo omu- 11. Ongalo imwe okwe i shika nomushikingalo Makilla. 

Okwa ti okwe lilonga oshilongwa eshi a li a ya moshipangelo molwomalodu na ita kendabala oku shi endulula vali. 

Lee Boy okwa twa ovanyasha omukumo opo ve likaleke kokule nomalodu shaashi ohaa nyonauna eenghalamwenyo dovanhu. 

Lee Boy ota indile yo ovashikingalo vakwao ovo va hala okuimba pamwe naye opo va kwatafane naye konomola 0812661299. 

-awakudumo@nepc.com.na