Auleria Wakudumo
‘SheSparkles’ ehangano la totwa kovakainhu ve litumba nohali kumaida nokundungika ovamati noukadona.
Ehangano ola totwa kuVistorina Hipangelwa opamwe naKertu Haitembu.
SheSparkles oha ningi omakwatafano okooumwe noumwe okukumaida nokutwa ovanyasha omukumo kombinga yonghalamwenyo osho yo omaifano opailonga.
Ehangano ohali unganeke yo oyoongalele okupopya novanhu vahapu poshikando. Oyoongalele ohai kala tai popi kombinga youleli, nokutwa ovaleli vokomongula omukumo.
Kakele kwaashi, SheSparkles oha wilike nokuyandja omadeulo kovamati noukadona ovo ve na eedula 12 fiyo 25 okukala ve na omukumo neitavelo muvo vene, omikalo nokulihumbata nawa tashi ningwa okupitila mokuninga omafiyafanepo okakadona dingi ile ovamati dingi osho yo okukala tava dulu okunduluka po oinima ihapu.
“SheSparkles oha longo ovanyanyamaulu owino yokeenyala, oku va kwatakanifa novanhu vahapu noku va twa omukumo opo va hange omalalakano avo,” ta holola ngaho.
SheSparkles okwa li a holoka koshoongalele shovanyasha osho shali sha ningwa kEenhana omafiku aa opamwe nomupeduminista wehongo Dino Ballotti.
Omukulunhuwiliki koshikondo shoimaliwa mehangano Tresia Nashidengo (23) okwa li a kwatela komesho oshikonga eshi.
Moshoongalele, ehangano ola mona omhito yokupopya novanyanyamaulu ovo vali va holoka nokuva twa omukumo momaifano avo unene moilonga yokeenyala.
Nashidengo okwa holola kutya okwa holola kutya ehangano lavo ola kwatela mo ovamati noukadona shaashi ova itavela kutya ngeenge oukadona ova kala hava tuwa omukumo, nena otava dulu okuyambula po nokunghanopeka omidingonoko davo.
Omanga ngeenge ovamati ova kala hava wilikwa, nena otava kulu vena oshisho nokukala ovaleli vokomongula veli nawa.
SheSparkles oheku pe omhito yokupopya oupyakadi woye moule ehena oumbada washa. Eshi ohashi dulu okuninga mekwatafano navo kooumwe ile mengungo lovanyasha tave li ndungike.