Okwa lopotwa ovakainhu va ninga oihakanwa yokuningilwa omatilifo efyo osho shi li hashi eta va kwatwe onghonga molwaashi ohava kala va tila.
Ounona voukadona navo ova ninga oihakanwa yokukwatwa onghonga kovapambele vavo unene tuu kooxe eshi hava ningilwa omatilifo omafyo.
Mexuliloshivike okwa lopotwa ovakainhu vavali va kwatwa onghonga moibofa ya yooloka konima eshi va nigilwa omatilifo efyo.
Oiningwanima yomakwatonghonga oya kolekwa komupopiliko wopolifi omupedukomufala Kauna Shikwambi.
Omukainhu weedula 22 okwa kwatwa onghonga konima eshi vati a ningilwa omatilifo efyo komulumenhu weedula 26.
Oshiningwanima osha ningwa mexuliloshivike kolukanda Okakango, kodoolopa Okakarara efimbo loufiku.
Opolifi oya hokolola tai ti omufekelwa ova shakena nomukainhu ou keendingosho.
Otaku hokololwa kutya omufekelwa okwa tameka okuningila omukainhu omatilifo kutya ote mu dipaa nombele ngeenge ina hala okuya naye moixulo.
Okudja opo vati omufekelwa okwa tutumbila nakuninga oshihakanwa keumbo laye ndele te mu nangala keenghono.
Oshiningwanima oshikwao, omukainhu naye womido 22 okwa kwatwa onghonga pefimbo a hangika ta ende moixwa ndele ta nukilwa komulumenhu.
Oshiningwanima osha ningwa mexuliloshivike komukunda Lisikili moshitukulwa shaZambezi efimbo loufiku.
Otaku hokololwa kutya nakuninga oshihakanwa okwa li ta ende mondjila moixwa eshi kwa li a ka tyaatyela ongodi yaye.
Opolifi oya hokolola tai ti omufekelwa okwa kuwa mokule ndele ta udika kovanhu kwa li tava ende pondjila opo.
Omufekelwa okwa faduka po nomakonakono opolifi otaa twikile.
Natango, opolifi moshitukulwa shaMusati otai konakona oshibofa shomulumenhu vati a kwatwa okaana kaye keedula 17 onghonga lwoikando ya yooloka.
Vati omulumenhu ou okwa kwata okaana kaye onghonga lwoikando ya yooloka ndele te ka ningile omatilifo nekatana kutya otekatete komutwe.
Oshiningwanima osha ningwa neudo okudja ketameko lodula meumbo lavo komukunda Ohendjeno moshikandjohoololo shaKalongo. Ovakainhu onghela ova lombwela Kundana tava ti oshoshili ova taalela omashongo okuningilwa omatilifo efyo kovalumenhu ngeenge tava pula vaye navo moixulo.
Opolifi oya kumaida oshiwana opo shi lopotele opolifi diva ngeenge tashi ningilwa omalifo omaludi a yooloka.
Opolifi oya yelifa tai ti okuya moixulo ohashi di kehalo lomukainhu ndele ha ku longifa eenghono shaashi osho ekwatonghonga. -fhamalwa@nepc.com.na