EENHANA – Minista woikwameni, eameno nomataulukilo keengamba Lucia Iipumbu okwa ti epangelo laNamibia naAngola ove lipyakidila okulongela kumwe nokukundafana nghene tava kandula po omukundu wounona ovakwashiwana Ovaangola ve li momapandaanda.
Edi minista okwe di popya oshivike sha dja ko kEeenhana pefimbo kwa li a ninga omutumba novapolifi osho yo ovanambelewa tava longele meembelewa dokuyandja omaufemba.
Elalakano lomutumba okukumaida ovanambelewa okukala tava yakula nawa oshiwana nokulonga nondjungu.
Konima yoivike itatu natango minista okwa li a ninga omutumba novanambelewa osho yo ovapolifi koshitukulwa shaMusati.
Iipumbu okwa yelifa ta ti Namibia ota kwashipaleke kutya ounona ovakwashiwana Ovaangola ove li meameno pehe na nande okaana ta ka ningilwa omunyonena ile omatilifo.
Okwa didilikwa ounona ovakwashiwana Ovaangola ve lihanena momapandaanda moNamibia tava landifa omaluko okutelekifa osho yo eedibo.
Ounona ava ove li meedoolopa da yooloka mwa kwatelwa oshilandopangelo.
Minista okwa pula oshiwana opo shiha ningile ounona Ovaangola ominyonena molwaashi osha puka.
Lwopokati opo, Iipumbu okwa pula ovapolifi opo va longe pauyuuki nokuyandjaneka omayakulo koshiwana.
“Longeni nondjungu okulwifa oimbuluma. Kaleni tamu fiki koshiwana ngeenge sha pumbwa omayakulo opolifi shaashi omwa pewa oshinakuwanifa shokukaleka po eameno,” ta ti.
Minista okwa lombwela ovanailonga tava longele keembelea hadi yandje omikanda da yooloka opo va kale tava popi momalaka omudalelwamo ngaashi shaashi ovanhu vamwe ihava udu Oshingilisa.
“Popyeni novanhu nawa ngeenge tamu fatulula kutya omikanda dilipipo da pumbiwa. Ovanhu vamwe ohava kala va dja komikunda dokokule ashike eshi tave ya kombelewa otamu va ngwadjaula fiyo tava ngwangwana,” ta ti.
Okwa yelifa ta ti mongula eshi natango omunhu ta alukile keembelewa ota lombwelwa komunambelewa kutya iha pwilikine ndele ta shunifwa ko ashike mboli omunambelewa oye ina fatulula nawa.
Mininista natango okwa kukumaida oshiwana opo shika tale ko oumutwe wavo keembelewa pefimbo molwashi paife keembelewa oku na oumutwe vahapu. -fhamalwa@nepc.com.na