Abraham Mwanyekange
Omukwatakanifi womaudano moshitukulwa Oshana Sem Nekwaya okwa ti ove li nale metifa lokulilongekidila ekopi loshifokundaneki shoThe Namibian.
Nekwaya okwa lombwela Kundana onghela ta ti otava twikile neudo nosheendo osho sha kala shi kwetele komesho ospana eedula mbali da ka piti.
Omudo keshe oshifokundaneki shoThe Namibian ohashi unganeke omaudano koitukulwa ya yooloka.
Omukulunhu wosheendo wospana yOshana Nghilengwa Victor Valdez okwa lombwela Kundana ta ti ova pewa ekwafo lopashimaliwa N$5 000 kehangano loRunns Group.
“Otwa teelela yo kombelewa ya ngoloneya oo naye ati ote tu pe omayambidido, osho yo omalelo eedoolopa detu dopatatu nao okwa ti otae ke tu vatela nakashona oko tava ka mona po,” ta ti.
Omudeuli Weyulu Nathan Hafuto okwa lombwela Kundana ta ti ove na ovadani ovo va tofa mov e li omi-25.
“Ovadani ovo ohatu twikile nokulilongekida navo fiyo osheshi ku na efiku limwe tu ye koudano opo nee omwaalu hatu ke u eta po20, ndele atu kaya nao komakondjifafano ekopi loThe Namibian,” ta ti.
Hafuto okwa hokolola ta ti oku na omukumo kutya ospana otai ka eta oidjemo i li nawa.
Okwa twikila ko ta pandula ovadali unene ovo have uya oku va yambidida nokutala ounona eshi tava dana efimbo lomalilongekido.
Okwa ti paife ova dana omaudano avali okulindjenekela oudano woshikundaneki oo u li ko momafiku atatu fiyo ahamano aApili neudo kodoolopa yaKeetmanshoop.
Osheendo shoshitukulwa shOshana osha fikama po movakwatelikomesho vooHafuto Natanel-omudeuli, Naboth Shikuni -omudeulikonaakon, Tobias Metusalem Djeimo – omudeulivateli, Indongo Nalimanguluke – omudeuli wovakwati, Kambinda Wilson – omundokotola,
Kanime Kefas – omufilishisho woidjalomwa naHerman Paulus – omukulunhu wosipana.