ONGWEDIVA – Ovanangeshefa osho yo ovakalimo vomodoolopa yaNgwediva otava nyenyeta tava ti ovalulilwa komapandaanda a dima, naashi osha eta eembudi di ninge dihapu paife. Ova nyenyeta tava ti neengeshefa davo paife oda shuna pedu molwaashi elelo lodoolopa yaNgwediva otali ende kashona okuyandjaneka omayakulo. 

Ovanangeshefa okwa li tava nyenyeta pefimbo loshiongalele sha ningwa kelelo lodoolopa yaNgwediva Etivali. 

Elalakano lomutumba ou okutopolelafana omayele nghene ovanangeshefa tava longele kumwe nelelo lodoolopa. Ndaambe Nekwaya omunangeshefa okwa nyenyeta ta ti ovanhu paife ova ninga oihakanwa yokunyekwa omaliko avo ngeenge tava momapandaanda molwashi omwa dima. “MOngwediva omu na omalamba mahapu itaa longo vali. Ohatu ende ashike momilaulu osho shi li sha nyika oshiponga,” ta ti. Okwa yelita ta ti ohava futu oshimaliwa shihapu shoifendela yokongulu kelelo lodoolopa ashike ka pena omayakulo. 

Omunangeshefa umwe Amel ia Schmidt okwa nyenyeta eengeshefa dihapu mOngwediva paife oda teka po molwashi elelo lodoolopa ola dopa okuyandjaneka omayakulo. “Eengeshefa detu ita di xumu vali komesho. Ongwediva kai li ngaashi kwa li nale. Otwa lulilwa unene,” ta ti. 

Hafeni Timoteus omunangeshefa, okwa ti eepate domOngwediva paife oda ninga omalambo osho yo omeva aatalama komesho yeengeshefa davo. 

“Muni waNgwediva okwa pumbwa okukala omutumba ndele ta faneke kutya eenhele dili pi da pumbwa omuyakulo shaashi ovanhu otava mono oixuna,” ta ti. 

Okwa ti ovanafikola koiputudilo ngaashi IUM mOngwediva ova ninga oihakanwa yokunyekwa omaliko avo shaashi momapandaand omwa dima. 

Pefimbo lomutumba, Mayola wodoolopa yaNgwediva Naemi Amuthenu okwa nyamukula ta ti ombelewa yaye oya shangela omukanda kehangano lokuyandjaneka omalusheno loNored opo li tule ko omalamba aa pe. “Nored okwe tu nyamukula kutya omalamba okwa pwa po,” ta ti. 

Amuthenu okwa ti elelo lodoolopa ola didilika omanyenyeto oshiwana nota li ka longa nondjungu okukandula po omukundu ou. Mayola okwa ti okwa didilika oshiwana ha shi kupula oimbodi keshe pamwe naashi itashi ulike efano liwa. Okwa kumaida oshiwana opo shi longifa eendoloma odo da yandjanekwa modoolopa okutula mo oimbodi shaashi otashi kwafele okukaleka po odoolopa ya yela. 

Omupopiliko wehangano loNored, Simon Lukas okwa ti osho shi li ehangano lavo kwa li lataalela eshongo linene lomalamba a pwa po oule woifike ivali. “Paife otwa mona omalamba. Ohatu ka tula ko omalamba aa pe keepala odo da dima mOngwediva,” ta ti. Lukas okwa kumaida oshiwana opo shi xulife okuteya po omalamba shaashi osha nyika oshiponga. Natango ovanangeshefa ova nyenyeta tava ti, elelo lodoolopa yaNgwediva oha li longifa oulingilingi ngeenge ta li yandje eetendela komaulikilo oipindi omOngwediva. “Keshe odula omunhu ashike umwe oye a pewa otendela ashike fye ihatu pewa. Ovanhu ve li mokakomitiyee yokuyandja eetendela neudo nava shendjwe ndele ta tulwa ovanhu vape,” umwe womunangeshefa ta ti. 

Eetendela ongaashi okuwapaleka, omahangano ovakaleli vomaliko, ovashikingalo osho yo okueta eetenda komaulikilo oipindi. 

-fhamalwa@nepc.com.na