Auleria Wakudumo
Elelo lodoolopa yaShakati otali ka kufa ko edu lofikola Oshakati West Primary School.
Otaku hokololwa ekufeko ledu olo li li oshitukulwa shetalululo netendululo leenhele molukanda omo ofikola ei yoShakati Primary School i li.
Omukulunhufikola pOshakati West Primary School Aila Kavungo okwa shiivifila Kundana kutya elelo ola lombwela ofikola opo vati i konge ovanhu ava tave ya okulonga odalate opo i shunifwe monima sha dja eshi olukanda la tendululwa.
“Otwa ninga ekwatafano nelelo hatu indile opo liha kufe ko edu lofikola shaashi katu na nale onhele ya wana yovahongwa ndele nofikola yoo vene oya finana nale,” Kavungo ta ti.
Nonande ofikola oyopedu ashike, oi na ovahongwa ve dule neesekundefikola dimwe nokuli. Oshakati West Primary School oi na ovahongwa 1 470 neudo.
Odalate vati oya teelelwa i ka kale ya twa meengulu dofikola ngeenge ya shunifwa monima.
Omukulunhufikola okwa weda po ta ti ofikola kai na okapale komaudano kovahongwa, onhele oyo hava longifa paife vati nayo oya finana ashike elelo otali twikile komesho vati nomhangela yalo.
“Ohatu kendabala yo okupopila eameno lovahongwa mofikola. Otwa tila yo odalate oyo tai etwa popepi novahongwa unene ofikola i na ounona vashona ngaashi yetu,” Kavungo ta ti.
Omunashipundi welelo lokakomitiye kofikola Immanuel Da Costa okwa holola ta ti ovadali ova hala ofikola i wedelwe fiyo ondodo 10.
“Oshakati West oi na elongo dingi modoolopa. Ovanhu ohava kala tava ti nokuli ofikola yopaumwene ashike ofikola ashike yepangelo,” Da Costa ta ti.
Umwe womovadali Elizabeth Nafuka-Shivute okwa holola ta ti ovadali kave udite ombili eshi ofikola tai kufwa edu kelelo lodoolopa yaShakati.
Mayola wodoolopa yaShakati Leonard Hango okwa ti ova omhangela yokutendulula olukanda laUupindi oya pwa nale nofikola oya kwatelwa mo mokutendululwa.
Hango okwa holola ta ti omhangela yeenhele depangelo ngaashi ofikola ohai kala nale i li kombelewa yelelo.
Elelo lodoolopa yaShakati ola holola yo kutya otali ka yandja ouyelele wa dedwa po kombinga yoshinima shatya ngaha kohainga.