Omukainhu weedula 40 okwa fya eshi a tuwa nombele kohonda yaye Etitatu lwopotundi 21h00 komukunda Nsheshe moshitukulwa shaZambezi.
Nakufya okwa tongolwa oye Sishazi Winnie Mushomana omukalimo womomukunda Nsheshe.
Omupopiliko wopolifi moshitukulwa shaZambezi Inspector Sitali Kisco okwa hokolola ta ti omukainhu okwa li tave lidenge nomulumenhu waye meumbo konima eshi va dja keendingosho.
Opolifi oya ti ova tameka tete tava tanguna eshi va fika meumbo, nokonima omukainhu okwa tameka okudenga omufekelwa needopi.
Omufekelwa okwa kufa ombele ndele ta tu ohonda yaye lwoikando ine komesho yokaana kavo kokamati keedula heyali.
Opolifi oya ti okwa li shinyanyalifa kokaana kavo eshi ka tala ina ta tuwa neembele kuxe fiyo omefyo eshi okaana oka kala taka kwena mokule ke wete ina ta dengwa.
Okaana kavo eshi ka mona kutya ina okwa tuwa nokulidenga po pedu oka lotokela poushiinda taka kwena opo ka ka lopotele ovashiinda kutya ina okwe lidenga po eshi a tuwa nombele kuxe.
Eshi ovashiinda va fika meumbo ova hanga nale omukainhu a fya e na eembululu dihapu kolutu laye.
Ovashiinda ova lopotela opolifi nokonima eshi opolifi ya fika oya kwata po omufekelwa shaashi omo a hangika meumbo.
Ovakwapata vavo ova shiivifilwa efyo laMushomana nomakonakono opolifi otaa twikile. Opolifi oya kunghulila ovadali opo va xulife po okukala tave li denge komesho younona vavo shaashi eshi otashi yandje efano lii kounona unene tuu ngeenge ovadali tava longifa oilwifo ngaashi eembele needjebo.
Opolifi oya weda po tai ti ngeenge okaana ka shona oka tale oshikumwifalonga shaina ile xee a tuwa nombele fiyo omefyo eshi otashi piyaneke omadilaadilo okaana ngeenge ta ka kulu.
– fhamalwa@nepc.com.na