OSHAKATI- Aaniilonga yehangano lyokwaandjeneka olusheno konooli (NORED) oya tameke iilonga Etiyali sho kwa li kwa pitikwa egwedhelo lyondjambi yokomwedhi konima ya li ya tula mo ekanka oshiwike sha zi ko. 

Omugandji gomauyelele mehangano lyokwaandjaneka olusheno Simon Lukas okwa ti, aanilonga okwa li ya zimine okushuna kiilonga sho Nored a li a shaina etsokumwe lyomimvo ndatu nehangano lyokukalela po aakwamina moNamibia, opo ya gwedhelwe oopelesenda ne osho wo oshimaliwa sha kala konima. 

Lukas okwa ti, etsokumwe ndyoka okwa li lya shainwa Etiyali lyoshiwike shika, moka aaniilonga ya tameke wo iilonga. 

“Ehangano olya tameka niilonga yalyo ngaashi shito notali tsikile okugandja omayakulo agehe,” ta kwashilipaleke ngaaka. 

Lukas okwa ti elalakano lyehangano lyawo okugandja omayakulo ge li nawa kaayakulwa yawo. 

Okwa gandja ombili kaayakulwa yawo, sho ya li itaaya vulu okuyakula omolwekanka ndyoka lya li lya tulwa mo kaaniilonga. 

Aaniilonga yehangano lyolusheno lyoNored, Etine lya zi ko oya li ya tameke nekanka ndyoka ya li ya tokola kutya otali kala po sigo ya yamukulwa kelelo lyehangano megwedhelo lyoondjambi. 

Reginald Kock, omuwiliki  gopashitopolwa mehangano ekalelipo lyaaniilonga yiikwamina, okwa ti aaniilonga okuza miitopokwa Zambezi, Kavango East, Kavango West, Ohangwena, Oshikoto, Oshana, Omusati noKunene kombinga, oya li tula po iilongitho okuza Etine, okuwayiminathana mekanka. 

Kock, okwa ti oya li ya tameke  nekanka lyawo nelalakano okupula oondjambi dhawo dhi li konima okuza mo 2024, 2025 no 2026. 

“Otwa kala nokupula omawunawa gondjambi dhokomumvo, ihe ewiliko lyaNored olya tinda oku yi tu pa,” ta ti ngaaka. 

Ta fatulula kutya omumvo 2025 oya pula egwedhelo lyoondjambi noopelesenda hamano, ashike ewiliko olya ti otali vulu ashike oku ya pa oopelesenda ndatu, shoka ya tindi. 

Kock okwa gwedha po kutya aaniilonga petameko, oya li ya pula oopelesenda heyali dhomagwedhelo goondjambi dhaaniilonga, taya kulula ko sigo opelesenta hamano taya hulile puntano ashike elelo lyaNored olya li lya tindi. 

Nena aaniilonga oya yamukulwa sho ya gwedhelwa, noya tameka iilonga. 

-vkaapanda@nepc.com.na