Omupolifi e li dipaa pefimbo loilonga 

Omupolifi e li dipaa pefimbo loilonga 

Auleria Wakudumo 

Omupolifi umwe okwa xulifa eshi vati e liyasha nombistoli yoilonga momutwe. Ovanailonga pamwe naye vati ove litwa olutu laye moixwa yopopepi noshitaasi shopOnkumbula opo a li ha longele. 

Oshiningwanima osha ningwa Olomakaya lwopo16h45, osha ningilwa moshitukulwa shaShikoto. 

Eshi osha kolekwa kukomufala wopolifi moshitukulwa shaShikoto Commissioner Teopolina Kalompo- Nashikaku. Nashikaku okwa holola ta ti nakufya vati okwa li a holoka koilonga mOlomakaya po14h00. 

Lwopo 16h00, nakufya vati okwa dja mo moilonga a ya konduda yaye nondjebo yoilonga ndele ina aluka vati vali fiyo efimbo lokudimbuka po22h00. 

“Efiku la landula ko, okwa li e na okutameka oilonga po06h00 ashike ina holoka koilonga,” Nashikaku ta ti. 

Ovanailonga pamwe naye vati ova kala va limbililwa eshi ina holoka koilonga nokuya konduda yaye i li momuhandjo wovapolifi ashike inave mu hanga mo. 

Konima vati ova landula eemhadi daye defiku la dja ko, okudja monduda fiyo opoixwa vati i li popepi opo va hanga a xulifa. 

Nakufya vati okwa hangika a djala natango oikutu yoilonga, e liyasha momutwe, nondjebo i li puye. 

-wakudumoauleria@gmail.com