Auleria Wakudumo
Omweeti woihokolola momhangu yaNdangwa Justine Shiweda okwa findikilwa keumbo laye laxuuninwa kovanhu omayovi okudja keembinga adishe doshilongo.
Shiweda okwa fudikwa Olomakaya pomaendo e li momukunda Onambango moshitukulwa shaShana.
Etumwalaka lOmupresidente Netumbo Nandi-Ndaitwah ola leshwa kOmuprima woshilongo Elijah Ngurare.
Omupresidente okwa ti ita popile eponokelo olo la eta efyo lomweeti woihokolola. Okwa ti Namibia oshilongo tashi lelwa nokupangelwa keeveta. Presidente okwa ti ite ke lididimikila eponokelo neningo lomatilifo tali ningilwa ovanailonga vouyuuki.
Nandi-Ndaitwah okwa holola yo kutya keshe etilifo kutya oluludi la tya ngahelipi tali ningilwa ovanambelewa vouyuuki, etilifo tali ningilwa oshilongo ashishe otali ka katukilwa onghatu yopombada.
Presidente okwa pandula Shiweda eshi a tula ombuda moshixwa nokuanya oulingilingi mokulonga oilonga yaye.
“Shiweda okwa li a itavela kutya ouyuuki itau dulu okulandwa,” Omupresidente ta ti ngaho.
Omanga ta lesha etumwalaka lomupresidente, Ngurare okwa indila Ovanamibia aveshe opo va tule oukuni kumwe vo va kwafele eefiye daShiweda nomukalo oo va eta po Etitano tau ifanwa oTrust Fund.
Owu omukalo wokwoongela oshimaliwa osho tashi ka kwafela ounona vaShiweda monakuiwa notashi kala koshi weliko lombelewa yaNgoloneya woshitukulwa shaShana.
Omanga ta hekeleke ovakwapata vaShiweda, Chief Justice Peter Shivute okwa holola elitulemo laShiweda moshikondo shouyuuki.
“Efyo laye inali kuma ashike ovapopepi vaye ashike ole tu kufa yo omunandjungu moilonga, osho yo omukondjifi woimbuluma moshilongo nomembo louyuuki,” Shivute ta ti.
Kakukutu komatanga opolifi Joseph Shikongo okwa kwashilipaleka kutya opolifi otai twikile okuninga omapekapeko nokukwashilipaleka kutya keshe ou e na mo olunyala moshiningwanima eshi okwa tulwa konima yekumba.
Shikongo okwa ti opolifi otai twikile okulongela kumwe noshikondo shouyuuki opo va kondeke nokuxulifa po eningo lomatilifo ile okuponekela ovanambelewa.
Nonande ounona vaShiweda ve li oimhutu natango, ova holoka komesho okuyandja etumwalaka lavo nomesho e hadi omahodi.
Ounona ovo ve na ashike eedula omuwoi osho yo heyali ova holola ina kutya okwa li e va hole nokwa li he va amene alushe.
Naukelo, okwa ti ota dimbuluka alushe eshi ina a li he mu lombwele kutya “ndele owu na oondunge nkelo” ngeenge alushe tava ningi oifiilwalonga yaye yofikola.
Ovamwaina vaShiweda ovemu hokolola onga omufilishisho oo eva kwafela okufuta omalihongo avo koiputudilo yopombada.
Ookaume nookahewa kaShiweda navo ove mu tanga ongomunambili, omulididimiki noku na olukeno navakwao.
“Kahewa ketu, okaadona ketu Kapandu, osho twa li tu hole oku mu ifana ngaho,” tava xukula ehodi.
Shiweda okwa xulifa momafiku a-7 Febuluali 2026, konima yokukala moshipangelo oule weemwedi nhatu lwaapo eshi a li a ponokelwa ndele ta yashwa nokutilwa omeva oudiyo momafiku 17 Kotoba 2025 peumbo laye mOndangwa.
Okwa li a tambulilwa moshipangelo shopaumwene mOndangwa nokonima okwa ka tuminwa koshipangelo shopaumwene Lady Pohamba moWindhoek omo a manena oweenda waye.
Ovanhu vahamano ove li moipandeko tava tamanekelwa eponokelo nedipao laShiweda. Otava ka holoka vali momhangu yaNdangwa momafiku 16 Malitsa 2026.
Ovo tava tamanekwa efyo laShiweda ovo Lukas Nekwiyu, Mateus Abner, Petrus Uusiku, Nghilifavali Johannes, Petrus Shikwaya nomundokotola Fillemon Nakanduungile.
Shiweda okwa fiya ko ounona vaye vavali, okakadona keedula omuwoi osho yo okamati keedula heyali, ovadali vaye osho yo ovamwaina vaheyali.