Ovanafaalama voimuna mOshikoto ova londokwa keemhofi  

Ovanafaalama voimuna mOshikoto ova londokwa keemhofi  

Omukulunhu wopolifi koshitukulwa shaShikoto, Commissioner Teopoline Kalompo-Nashikaku okwa ti ovanafaalama nava longele kumwe nopolifi okukandeka oumbudi woimuna moshitukulwa.

Nashikaku okwe lipyakidila nokuninga omitumba novanafaalama koikandjahoololo ya yooloka e li meenghundafana nghene oimbuluma tai kandekwa keefaalama.

Okwa popya ta ti okwa didilikwa oumbudi woimuna wa londa moshitukulwa shaShikoto unene woikombo neengobe.

“Ovanhu otava vake po oimuna ya vakwao ndele tava ka landifa ile va ka landife okapana,” ta ti.

Nashikaku okwa ti ovanailonga vamwe vokeefalama ohava longe kumwe novanhu hava landifa oupana.

Pefimbo lomutumba ovanafaalama ova lombwela Nashikaku tava ti ova taalela omashongo oimuna tai vakwa po nosho yo eemboola domeva tadi teywa po kookalyamupombo. 

Okwa nyamukula ta ti ombelewa yaye otai ka kwashipaleka kutya oimuna yovanafaalama oi li meameno tashi pitile mokukwata po ookalyamupombo. 

“Onda didilika omashongo a taalelwa kovanafaalama. Ohatu ka longela kumwe navo opo tu kandeke oimbuluma keefaalama,” ta ti.

Okwa yelifa ta ti oimuna oya fimana koshiwana molwaashi ohai lwifa ondjala noluhepo nosho yo okuyambula po eliko loshilongo.

Okwa kumaida ovanafaalama opo va kale ve na ekwatafano liwa momidingonoko davo okukala tava longele kumwe navakwao.

“Kaleni mu na oukumwe noushiinda muwa. Ngeenge omwa mono mofaalama ya mukweni tamu shingwa oshimuna lopotela opolifi diva,” ta ti.

fhamalwa@nepc.com.na