Ehangano li lile po epangelo lyoondjila lyedhina Roads Authority (RA) olya kumagidha oshigwana shi talele po oombelewa dhoNaTIS opo shi gandje uuyelele wu li mondjila woonomola dhoongodhi osho wo hoka ya hala ku pitile omauyelele opo ya kale taya tseyithilwa uuna omikanda dhawo dha felefala.
RA okwa pititha omushangwa kutya oye ya po nomukalo gokuandjaneka uuyelele kombinga yomayakulo ge na sha nokuhinga osho wo omikanda.
“Shika otatu shi ningi opo tu hulithe po okutseyithila ookasitoma dhetu okupitila kopoosa, oshoka pethimbo ndika omalungula ogo haga taandeleke omauyelele mbala shi vulithe oombapila,” RA a shanga ngaaka.
Taya ti. okuza paife itaya kala we taya tu mu oombapila okupitila kooposa ihe otaya kala taya tumu omatumwalaka koongodhi osho wo kooe-mail.
RA okwa ti, shika otashi ka kwathela wo ookasitoma dhawo dhaa longithe oshimaliwa nethimbo lyawo oku ka tala oombapila, ihe otaya kala taye shi ningile momitumba dhawo.
“Ookasitoma dhetu inadhi pumbwa okuthika poombelewa okuningulula omikanda dhawo, ihe otaya kala taye shi ningi okupitila komalungula,” ya ti ngaaka.
Onkene otaya thindi omuthindo opo kehe gumwe e na omukanda a kale a gandja uuyelele wul i mondjila hoka taku kala taku pitile uuyelele awuhe.
RA okwa gwedha ko wo kutya omahangano, uuministeli nomandiki uuna ga hala omayakulo shi na sha nokuningulula omikanda osho wo yilwe, naya kale taya tumu ooe-mail ku “natishelpdesk@ra.org.na” ya shanga uuyelele wi ihwa po kutya oyo oolye naashoka ya hala okuyakulwa nasho.
“Ookasitoma nadhi i ishangithe okupitila komalungula ko www.ra.org.na.,” RA a kumagidha ngaaka.
Ya ti, ookasitoma otadhi kala tadhi tuminwa omatumwalaka okupitila koonomola ya gandja nokutseyithilwa kutya omikanda dhawo odhi li pokufelefala uunake omanga ku na omasiku opo ya vule oku dhi ningulula omanga omasiku inaga adha.
Ya gwedha po kutya omayakulo ogendji gaNaTIS paife ohaga ningwa okupitila komalungula nopangodhi.
Naamboka haya shanga okakonakono okumona ombaapila yokwiilonga okuhinga, osho wo mboka ya mono omukanda gokuhinga ohaya tseyihilwa okupitila mokatumwalaka okafupi koongondhi dhawo, kutya oya pita.