Auleria Wakudumo
Sha landula eshi minista wouhaku nonghalonawa Dr Esperance Luvindao a shivifa kutya ovanailonga vepangelo aveshe otava ka ka longifa oipangelo yepangelo okudja mu01 Apilili 2026, oshiwana osha kala shi na omaliudo a yooloka kombinga yaashi. Lesha omaliudo oshiwana kombinga yelongifo loipangelo yepangelo ponhele yokulongifa oipangelo yopaumwene.
Duminga Ndala (Omuxwaxwameki wevava lovanyasha loLandless People’s Movement LPM)
Etokolo eli ngeno oliwa noli na omauwa mahapu ngeno okwa li epangelo la kendabala okukandula po omikundu mouministeli wounamiti tete.
Oipangelo ihapu otai longo noudjuu molwaashi kamu na omiti noipangifo ya wana. Ovapangi ovashona nomwaalu woipangelo oushona.
Ngeenge owa weda ko ovanaudu 119 000 nena otashi ka kala shidjuu okuva fiila oshisho navamwe otava ka xupa ko kepango.
Winnie Moongo (Oshilyo shomutumba wopashiwana shongudu yoPopular Democratic Movement (PDM), oo yo e li omupangi keifano)
Ohandi pandula epangelo eshi tali kondjo okuyambula po ouhaku moshilongo konima yeedula 35 demanguluko. Nande ongaho, elunduluko nali ningwe ngeenge epangelo le lilongekida nawa ndele hameendelelo. Etokolo lovanhu aveshe vo-PSEMAS tava pangwa kepangelo otali dulu okweeta okatongotongo moipangelo. Oilyo yo-PSEMAS tai pangwa tete kwaavo vehe na sha. Natu hovele manga kokutunga nokuwedela oipangelo, okukuta ovapangi neendokotola da wana, omiti, omashina noikwafifo yaw ana omanga ina tu ninga etokolo eli.
Dr Nelson Makemba (omundokotola)
Etokolo eli inali eta ashike engwangwano mokati koshiwana ndele ola eta yo engwangwano nomovanambelelwa vouhaku.
Fiyo opapa inatu mona elombwelo kutya olyelye ta kala ta pange oilyo yo-PSEMAS.
Katu shi ngeenge eendokotola dopaumwene otadi shikula ovanaudu vavo ile ongahelipi. Otwa fiwa nofogo osheshi katu shi ngeenge oipangelo otai wedelwa okukwatela mo ovanaudu vape ile otai tungu omawalanda ovanaudu vopaumwene.
Lwaxuuninwa onda hala okushiva ngeenge opa li ngaho pwa ningwa omapekapeko omanga etokolo eli inali tulwa moilonga. Ondi wete epangelo la dilaadila nawa ashike onghatu ei la katu ka nayo otai dulu okushunifa monima ouhaku aushe.
Ndumba Kamwayah (Omuhongi koshiputudilo shopombada shaUnam nomunawino moikwapolitika)
Ondi wete epangelo inali diladila nawa okuninga etokolo eli. Okuwedela omwaalu wovanaudu moipangelo omo mu na nale omwaalu wovanaudu muhapu, omiti noikwapangifo inai wana novapangi otashi eta ashike omikweyo diledile, novanaudu tava shuna inava pangwa.
Onda lesha yo kutya Omupresidente Netumbo Nandi-Ndaitwah novanambelewa vopombada navo otava ka pangwa koipangelo yepangelo, navo otava ka ya ngaho momukweyo? Ava hava futu oimaliwa yavo ko-PSEMAS opo va mone ouhaku navo ove na oufemba wokupangwa koipangelo yopaumwene ove na oufemba okuktya kosha koshinima eshi ndele haku fininikwa kongudi.
Lilani Brinkman (Oshilyo shomutumba wopashiwana noku li omudidimbe minista wongudu yoIndependent Patriots for Change (IPC))
Ongudu yo-IPC otai holola okatendo 21 kotete taka holola kutya keshe omukwashiwana oku na oufemba wokukufa ombinga momatokolo eliko nomakwatafano opaunhu oo mwa kwatelwa okuninga etokolo louhaku unene ngeenge ovanhu otava futile ouhaku wavo vene.
Okutokola opo avanailonga vepangelo va hovele okulongifa oipangelo yepangelo nonade oipangelo ina omayakulo eli pedu kashili mondjila. Ovanhu nava pewe omhito opo va hoolole voovene ngeenge ova hala okulongifa oipangelo yepangelo ndele inava findilwa kongudi.
Ester Haikola (oshilyo shomutumba wopashiwana shongudu yoAffirmative Repositioning AR)
Inatu tya itatu ka pangwa koipangelo yepangelo. Ovadali vetu ohava mono ouhaku koipangelo oyo noko hatu kala konyala keshe fiku novapambele vetu.
Otwa hala ashike oipangelo yepangelo i kale ponghatu yopombada mouhaku nokuyandja omayakulo ongushu kovaNamibia.
Ouhaku nehongo nali kale alushe olo fimba ina ongodi moshilongo. Otwa hala oipangelo neefikola da tungwa, di kale tadi longifwa kukeshe umwe ndele hakwaava ashike vena oyuuyemo ile oohashike shalye.
Naava hatu lwifa etokolo eli hasheeshi twa hala ouwa wetu ndele owOvanamibia aveshe.
-awakudumo@nepc.com.na