Eshi kwa didilikwa osekundofikola yaMungwelume ya kala ya taalela eshongo loikwafifo yokutelekela ovanafikola ve li momuhandjo, ombelewa yehongo moshitukulwa shaHangwena oya yambidida osekundofikola yaMungwelume noikwafifo yokokombifa.
Ofikola oya pewa eembiya dokolusheno, oitaafula 30 yokulila ovanafikola, oipundi 60, omakopi okolusheno neekila dokutula oivelelwa noikumwa yovanafikola.
Oinima aishe ya yandjwa kumwe oili pongushu yoshimaliwa N$600 000.
Okwa didilikwa ofikola Omungwelume ya kala tai longo noudjuu okuyambidida ovanafikola ve li momuhandjo eshi mofikola muhe na oikwafifo yokulongifwa kekulo nokomuhandjo wofikola.
Osekundofikola yaMungwelume ohai xupu ashike ngeenge ya pewa omakwafo okudilila moshiwana ngaashi okutungilwa omuhandjo, omatalashe, nokombifa yokutelekela.
Omukulunhuwiliki wehongo moshitukulwa shaHangwena Isak Hamatwi okwa ti ombelewa yaye oya kala ya didilika eshongo la talelwa kovanafikola eshi va kala vehe na oipundi noitafula yokulongifa kokombifa.
“Elalakano otwa hala oku kandula po omukunda ou wa kala uli kofikola opo ovanafikola va kale ve li monghalo iwa ngaashi naana esekundofikola dikwao,” Hamatwi ta ti.
Okwa ti ngeenge keesekundofikola oku na oikwafifo ya wana eshi otashi yandje ohokwe kovanafikola opo va pite noitwa iwa kexulilo lomudo.
Pefimbo ta tambula ko oikwafifo omukulunhufikola wosekundofikola yaMungwelume George Nanghanda okwa ti oikwafifo va pewa otai ka eta enduluko mofikola shaashi paife otava kala tava longo noupu ngeenge tava telekele ovanafikola.
Okwa ti ovanafikola okwa li hava telekelwa pondje eshi kwa li pehe na eembiya dokolusheno, vo okwa li hava lile poluhayela shaashi ka kwa li pena oipundi.
Nanghanda okwa ti ofikola natango oya pumbwa okuyambididwa ngaashi omatalashe okomuhandjo noitungifi yokutunga okombifa yokulila ovanafikola.
– fhamalwa@nepc.com.na