Auleria Wakudumo 

Omulumenhu weedula 23 okwa xulifa eshi vati a nwa omuti woxylocaine, hau longifwa moipangelo okufifa poipute ile poitukulwa yolutu opo pe na ouyehame wa pitilila ile tapa pula okuhondja ile etando. 

Oshiningwanima eshi osha ningilwa moshipangelo shepangelo moGobabis, mOlomakaya lwopo 21hoo. 

Nakufya okwa tongololwa oye Terrence Moyo. Omupopiliko wopolifi, Deputy Commissioner Kauna Shikwambi okwa koleka oshiningwanima eshi. 

Otaku hokololwa Moyo a li a tulwa moipandeko kopolifi shaashi a hanauna po omaliko ovanhu nokwa twalwa koshipangelo opo a ka mone ouhaku wa wedwa po shaashi okwa li e limonifa oshiponga komunwe. 

“Omupangi oo a li ta hakula Moyo okwe mu fiya mewalanda omo hamu endelelwa po ovanhu hano moemergency ward omanga a ka tala oihakulifo imwe vali,” Shikwambi ta ti. 

Otaku hokololwa Moyo a vaka po okakende keemiligrama 10. Eshi omupangi a ka aluka, Moyo okwa pula omupangi opo a ye kokandjuo oko a ka nwina omuti oo. 

Mokualuka kokandjuo, Moyo okwe lidenga po nokuxulifa. Eendokotola novapangi ova kendabala oku mu xupifa ashike ova xulila mounyengwi. 

Ouyelele otau ulike omuti oo wooxylocaine hau dulu okuetela omunhu edengo lomutima noku mu dipaa,

-wakudumoauleria@gmail.com