Omumbonde wOmbanderu mbwa wirire mOtjomuise Osondaha ndazuko maukaza kEpukiro ku waungurira ama ka kayatakana pOmimbonde vitano nokeye kosarama a maa ukotoka a u kapita kOkahandja omuyaruke Orata Onene Gerson Kunomundu Katjirua kumasuvisiwa morumbo rovahona.
“Komuhona we, otjatjivahungira kutja Katjirua orukaku rwe nu atjazera orukaku rwe rukurame mozombaze ze, ” Omuhungirirepo wOvambanderu Uazenga Ngahahe Tjiposa matja. “Oritjatatu ovandu mavekaata pOmimbonde Vitano kozoiri mbari, tjazumbo avei kofarama okumavekakara ngako Ritjatano tjimavetanauka okukotoka nguno. Nai ozo andaha mazekaenda ponganda mo WANAHEDA, Ondundu Street,” Tjiposa matja.
“Wa ṱiza omuhoko mbwi nokuhinokuteratera. Wa ṱiza omuhoko mbwi tjimuna tjau nanwa i yombara Munjuku II Nguvauva. A ṱiza omuhoko mbwi nganda atu kara nonḓurumbata yovanatje vevari mbu twari nawo kutja ngu ma hiti motjihavero ouṋe?”
Orata Onene yOuhopare wOmbazu wOvambanderu, Arnold Ripuree Tjozongoro ma tja, tja teza ozondambo ozongoto nozonde nḓa yata Orata Onene ongwao, Gerson Kunomundu Katjirua. Aye mu yarura kokure oruveze Ovambanderu ndu ave paha okuvarwa nokuzemburukwa otjomuhoko kuwo ouini mbu mau rikuramene nganda au zemburukwa tjimuna tji wa zemburukwa ngandu kundino ndi tji wa rira ouhonapare wombazu mbwa zikama.
Osondaha Katjirua otja tokererwe ama womborokere mOtjomusie kehi youvere ousupi nozombura o-82. Nomuhoko wOmbanderu au tonwa okati komasa.
Noondarire kutja Ovambanderu nOvaherero ve tja: “pe ṱa mbanḓe pe yaruka mbanḓe” nu wina ozombanḓe zarwe ozengi momuhoko omu zeri embo riurisiwe ndi tja ouzandu kaupasanewa norure okusetika ondovi yomuyaruke Katjirua.
Ombara omuyaruke Killus Nguvauva tja zire nokuwomboroka mo 2020 Katjirua otja tja tje ṱiza omuhoko e u ṱiza rukwao ngandu tji mau twa po nokuzika ombara ndji ri po nai Tjozohongo II Nguvauva. Tjozongoro otji ma tja nandaku omuyaruke Ombara Munjuku II wa suvisiwa mOmauezonjanda, omuyaruke Katjirua etje kemurarisa pozombaze ze.
Tjandje vari indjo ondyero yotjiwaṋa tjOmbanderu nu wina Munjuku II wa suvisiwa mOkahandja morumbo rovahona vOtjinguvauva.
Katjirua wa kwaterwa mOnḓu ya Mukundua, Okomumbonde tja Pukiro mo 1941, wa ṱakama rukuru okuungurira omuhoko wOvambanderu otjorata yOuhonapare wOmbazu wOvambanderu kehi yOmbara Munjuku II aeri otjirengeona mo 1972. Okuza mba arire na karerere otjomukarere womuyaruke Ombara Munjuku II ngandu tji ma ṱu mo 2008.
Omuyaruke Kati Nguvauva tja ṱiza otjihavero wina e mu tjevere ngandu otjihavero tji matji kamburwa i yomuzandona we Killus Nguvauva. Nu Killus ngunda aye ri moviungura vyohoromende otjihavero hi a ṱiza aha panḓere po tjiva momuhoko otja tji ve tira kutja ma panḓere po nu wina Killus tja zapo a ṱiza.
Aruhe tji ma hungire pu kangamwa otjitjitwa kutja otjombazu poo omouparanga wovitjitwa aa kondjo okukuna ombwaneno momuhoko. Meeku tjiukirwa kerakiza re ndaari tja: “mokutwarasana omambo na kangamwa aruhe sepo oruveze rokutja omundu muhuka mu yenene okukahungira kumwe.”